A buoltas, a buoltas

A buoltas, a buoltas,
sien piçca-piçca se andaba
i l tráfego nun se atalancaba.
Un talhico de trés pies al meio,
un pedragulho, ua bacie;...
ui!... esse parto era custoso,...
quando la baca a seguir a un peido,
anunciaba algo mal cheiroso.

Anfingida para quei?!!
Alguas bezes inda anfingi
...anfingi...que nun bi…
nun bi la buosta a caer,
chegando-me esso a baler,
ua baliente ralhatina:
Bá a ber nina, pon-te fina,
que l grano nun se puode perder!

I na bustraca a seguir,
ponie-me de pies ne l trilho,
cun ua mano siguraba la bacie,
ponie l' outra ne l nariç,
mas la merda era tan pesada,
l quei you habie de fazer,
l´'outra mano le tenie que poner,
para la sigurar melhor;
apuis benie-me aquel fedor…
…mas que remédio you tenie,
que nun fura abantar,
cara birada, sien mirar,
para apuis la ir arramar.

I las buoltas cuntinában,
ou por fuora ou más por drento,
habie que çfazer la palha
para de l grano l'apartar,
i siempre abantar l termiento;
assi, de sol a sol you andaba,
anriba l trilho, a medrar.
I debaixo daqueilha calor,
ousaba un chapelico de palha,
cun la cabeça portegida,
anque ls braços i las piernas,
si me quedássen an frida.

Apuis, al fin de la trilha,
miu abó daba-me dues crouas
i que cuntenta you quedaba,
… anque fusse pouco l balor;
lhebaba-las a la fiesta de l Naso
i cun eilhas mercaba,
saltaretes i un atrabessador.