Crisántemos

Fui até la tierra adonde naci
nestes dies de sol, d’aire i tamien de chuba.
Passemos sierras, passemos balhes,
cidades, aldés, muntanhas,
tierras de pan cun sues yerbicas
yá milagrosamente berdes
i todas las quelores de l Outonho
nas fuolhas douradas de las arbles
até Miranda…
até Sendin.

Habie froles ne ls semitérios
i gustei de ls ber assi
luminosos i outonhales…
I fui ende que bos bi tamien
primas, amigas de siempre
que benis tamien de loinge
porque achais, cumo you,
que ye mais que un deber
ye un abraço que le damos
mais ua beç a todos aqueilhes
de que siempre mos lhembraremos
i que mos dízen :

La bida ye cúrtia !
Dai siempre balor
até al biento que passa
i oubi-lo falar a el tamien !
Tamien ten cousas para dezir
Tamien ten cousas para cuntar…
para quien las quier oubir…
para quien las sabe scuitar…

Ls crisántemos que mos traeis
han de dar siempre froles!
La natureza ye assi mesmo:
un eiterno renacimiento
de bida de semientes !
Por esso traei siempre
l que bos dir la gana de traer:
froles porque tamien ye desso que gustais
i juntos cuntinaremos
a oubir l biento que passa
i mos diç tamien :

La bida ye cúrtia
por acaso !
cumo l tiempo que dura ua flor
mas nun ye eilha que ten la culpa !
La culpa ye de l tiempo...
L tiempo que siempre passa
i que até you
nunca nunca cunsegui parar !

I esso
ye l que l biento mos diç…
L biento que tamien passa
i que tenerá siempre cousas
para mos dezir.