Georgete ye ua ciguonha
Que naciu an San Martino
La mai botou-la de l nial
Ancomeçou assí l çtino.
Apanhou-la tiu Caguças
Pa la cuitada criar
Tanto el cumo la sue tie
Tenen-la feito medrar.
Anda siempre na cumpanha
De l perro, sou armano
Que quando eilha percisa
Siempre l bóta la mano.
A tiu Caguças i sue tie
You digo-le muito oubrigada
Por tenerdes salbo la cigunhica
Que pula mai fui mal amada.
Agora solo speramos
Que un ciguonho la namore
I que tengan muito filho
I ls crien cun muito amor.
Ciguonhica de San Martino
Tu bás a quedar na stória
Porque ua stória assí
Naide daba fé, nien mimória.
La tue stória yá bai
Na anternete quedar
Para que todo mundo leia
I la puoda apuis cuntar.
Agora mie ciguonhica
Tengo-te un pedido a fazer
Se bolares pula Speciosa
Quiero que me baias a ber.
4 comentários:
Buonas tardes Delaide,
guapos bersos subre la ciguonha de San Martino. Isto ye la proba probada de l grande poder de adaptaçon de todo l reino animal. Ls ambiantalistas a las bezes fáien tanto barulho i nun anténdan nada de la rialidade destas cousas.
Un abraço,
Francisco
Ye berdade, Francisco.
Anté ls ratos son ampedimiento para obras... Mas bá, a las beçes son outros antresses....
Bs
La ciguonha i l Perro... Georgete, guapo nome. You oubi muita beç la cuonta de la ciguonha i la raposa que mi mai me cuontaba.
Era ua beç,...
Saludo,
ACangueiro
nun sei l nome de l perro. Si, para ciguonha, Georgete ye un nome bien guapo. Peç que son amigos, ls armanos de criaçon.
Liçones de bida...
Enviar um comentário