Bubiemos auga nas mesmas fuontes

Cumbíbio (magosto)dantes

La cisma ye quaije siempre la mesma.
Apuis de ls cumbíbios culs mius cunterráneos, ben-me a la mimória ls datrás, ls purmeiros magostos, ls jogos tradecionales, la comemoraçon de ls dies de fiesta de l’aldé acá (Lisboua).
Tamien este anho apuis de l magosto m’acunteciu, nun fui capaç de bardascar l sentido i alhá staba el, cumo se fuora ua máquina de cinema a rodar las eimaiges a branco i negro de la cemba d’ajuntouros.
Mas la berdade ye que a mi m’agrada relhembrar todo esse dantes, outros tiempos, ye cumo bolber a bibir-los.
Éran ajuntouros adonde to la giente de l'aldé (Zenízio), fussen solteiros ou solteiras, casados cun filhos i sien filhos benien. L magosto era assi cumo ua çculpa, quando s’arrimában bibiemos chenos d’áncias, cumo nino spera pur die de fiesta para quemer rebuçados. Chegabamos al termo lhougo al çpuntar de l die (a la purmanhana) para stender las mantas de trapos ne l chano, anriba las cestas i las cerronas chenas de l melhor que habie para almuoçar.
Fusse pan de fogaça, pito assado, bacalhau frito, presunto ou chouriço, todo era ringalheira para mantener l sprito de partilha que se querie persente i regado cuns buns tragos de bino dua bota que passaba de mano an mano. Debidir culs demais, ouferecer de la nuossa merenda, fazer gusto an porbar uns cibicos de chicha, de pan lebe era nesse tiempo proua.
La comesaina anchemos l stómato, ls mimos trocados i las cumbersas atrasadas fortalecien l’amisade, l tiempo nun mos rendie, naide se querie ír, las çpedidas nun éran deseadas i la purmessa de tornar quedaba feita.
Naide dantes tubo ua preparaçon, éran las nuossas buntades de star eili, de cumbibir de star an quemunidade, nun habie uolhos pa las defrenças, para alhá de las parentenas stabamos lhigados a la mesma aldé, comungabamos todos dun sentimiento de soudade, de haber nacido i bibido nun sítio antriçado antre dous cabeçicos i bubiemos auga nas mesmas fuontes.
Apuis si, alhá pula tardica benie l tiempo d’assar las castanhas, las lhabaredas de la fogueira cumbidán to l mundo a reunir, que de manos ciscadas íban çcascando ls bélhos i anfarruscado las caras.
Nadie lhebaba a mal, era la proba de que stabamos an fiesta.
Porque se muorrírun para alguns esta buntade i deseio de partilhar estes cachicos?
Se pa ls mais nuobos you ancuontro rezones de sobra, puis ls tiempos son outros i eilhes medrórun, estas tradeciones i questumes yá pouco le diç a nun ser l lhaço familiar, mas you nun acredito que ne l coraçon de ls mais bielhos nun haba ua frincha de soudade, nun steian grabados muitos destes momientos.
La bida de cada un de nós tamien se fai cul passado, la bida de ls Boubielhos (Zenizienses) tamien se fai an buolta de l’Associaçon.
Neilha inda arde la fogueira de la partilha de la harmonie.
Assi nós l quergamos i biba Zenízio

La fuonte de l Molinico (de antre las peinhas mana ua auga saborosa i lhimpa)