25/07/08

L dito



Hai dies que tamien you m’anjoldeiro loinge da l cortiço para dar uas sbolaciadelas por ende afuora cume quaije todo mundo. Nua dessas salidas dei de caras c’ua fiesta cun banda de música i todo, menos foguetes para nun queimar las alas i antón fui-me achegando, achegando, a ber se dában alguns antremocicos assi cume nas fiestas da l Praino. Un ouro cada malguita! dezie la tabuleta spetada no alguidar inda quaije cheno. Pus alhá tirei la moneda debaixo dua ala, agarrei l saquito i ampecei a caminar pulas bordas de la giente antes que algun me xotasse sien querer, pansando que era algun atabano. Si, que ua grande parte de las gientes que naciu i bibe nas cidades anté piensa que las maçanas son fabricadas no mesmo sítio an que se fai l papel. Arrodiando l terreiro miraba, miraba, cume se quejisse angulhir todo cun ls uolhos, ora a la dreita, que saia tan guapa, ora a la esquierda, un garotico a quemer un manelo de açucre, aspuis an frente, ua nina a pedir chin chin, más alantre dous palumbicos acabados de poner anielhas ne ls dedos ponien-se a modos de quedar más guapos nos retratos para un die amostrar als nietos. El falaba pertués mas eilha atrabessa l castelhano. Anton bieno-me a la eideia l dito: “de Spanha nien bun biento nien bun casamiento”. Nun ye que a mi se m’amportasse muito cul casamiento, mas essa de l’aire … afinal you tamien habie benido meio daquel lhado! Cunfesso que inda me cheguei a assustar, bundaba que algua alma çcubrisse que aire me habie lhebado anté eilhi.
Cada beç más me arresquinei anté un punto adonde yá nun poderie passar. I agora?! L peso de ls antremoços nun me deixaba bolar, por esso la selucion era pegar un barquito que eilhi quedaba parado. El me salbarie quando me ajudasse a passar la ribeira … ou pula scrita que cuntrariaba l dito.






2 comentários:

AF disse...

Buonas nuites,

Á Abelhon, aire de Spanha muito tu haberás respirado i nun me parece que te haba feito mal. Bien pior son ls antramoços que... comiste muito i apuis yá nun podies... bolar. Hai que tener siempre muito cuidado cul que ben apuis de ls antramoços, i esso yá ye de to la bida.

Abraço,
Amadeu

Abelhon disse...

Buonas tardes

Hai aires calientes que són assi cume assopradelas que mos ampurrian adreitos al cielo, daqueilhas que manténen las aiglas i gabilanes horas a filo a bolar sien ua batida d'alas, nada que se acumpare cul que trai cenceinho i geladas maiores que nuites d'Eimbierno.
Se calha ye por bias desse regelador de uossos que tamien chaman al Praino la Tierra Frie!

Un abraço,
a bolar zde las praineiras d'antre la Lhuç i Ourrós