14/07/08

L Ansino de l mirandés an Corroios. Un cachico de stória (2)



Acertada la colaboraçon antre las dues Associaçones, habie que ampeçar l trabalho. Assi, l persidente de l´ANB, Leonardo Antão, cun la buona ajuda de l sócio Manuel Dias, ancetou cuntatos cun la direçon de l Clube Cultural i Recreativo do Alto do Moinho an Corroios, tenendo an bista arranjar ua sala para dar las aulas. L persidente de l clube, Comandante Torres, biu lhougo cun buns uolhos esta eideia i lhougo puso ua sala a la çposiçon sien pedir nada an troca. Assegurada que staba la sala, habie que arranjar las anscriçones i fui isso que l´ANB fizo.
An finales de Setembre, ampeço de Outubre de 2004, l persidente de l´ ANB Leonardo Antão, antrou an cuntato cun l´ ALM, atrabeç de l porsor Amadeu Ferreira, dando cunta de l trabalho feito i dezindo que las cundiçones lhogísticas stában asseguradas para einiciar l curso. Asseguradas estas cundiçones ls porsores Amadeu i Francisco, cumbersórun subre l modo de struturar l curso i la data de ampeço. Apuis de acertar todos ls pormenores dórun coincimiento a l´ ANB, para esta anformar ls alunos de la data de l ampeço de las aulas.
Chegados a la purmeira aula, ne ls ampeços de Nobembre de 2004, ls mais de binte alunos stában cun algua curjidade an saber l que se eirie a passar nessa aula i nas que benien a seguir. L porsor Amadeu Ferreira, apuis de cada un se dar a coincer fizo un brebe resume de l que serie l curso i la matéria que cada porsor eirie a trabalhar mais. Assi, quedou cumbinado que l porsor Amadeu se dedicarie mais a la stória de la lhéngua i a la cultura mirandesa i l porsor Francisco quedarie ancarregue an trabalhar la lheitura, la scrita, la fala i l bocabulairo.
(cuntina)

Francisco Domingues, 27 de San Juan de 2008.


1 comentário:

leonardo antao disse...

Amigo Francisco
Esta anteressante stória de cooperaçon de las dues associaçones de l Nial de la Boubielha i de la Lhéngua Mirandesa, zampenhou un papel ampotantíssimo no zambuolbimento de la scrita i de la fala de la lhéngua mirandesa, antre las dezenas de alunos que frequentoran l curso de mirandés dado an Corroios.
Cun estes cursos ficou bolorizada la lhiteratura mirandesa, cuomo se puode berificar pula grande quantidade de testos screbidos por alunos desses cursos, alguns dels publicados neste blogue i no site de la Associaçon Nial de la Boubielha.
Estes testos son ua buona proba de l anteresse an mantener i promober l precioso falar que mos deixoran ls nuossos antepassados mirandeses i, inda mais amportante, cuontribuiran para recuonstruir ua berdadeira família de scritores mirandeses, ne ls alredores de Lisboua.
Grácias a estes cursos de mirandés dados an Corroios por Amadeu Ferreira (l purmeiro i segundo) por ti Francisco (l segundo i l terceiro, neste último ajudado por Basilio), chubistes pal nible de un de ls melhores oubreiros de de la lhéngua mirandesa nesta grande área de ls alredores de Lisboua, dado que cada de ls cursos fui ua buona sementeira pal zambolbimiento de la lhéngua i de la cultura mirandesas. Un abraço de l siempre amigo, Leonardo.