Outárquicas

Se hai ua cousa que muito me surprendiu este berano (i yá nun ye d’agora; penso que tamien surprende qualquiera pessona que mora an França cumo you ou anton noutro paíç) fúrun todos ls cartazes por esse Pertual fuora para anunciar,  i mostrar subretodo (Nun baia un a passar al lhado i dezir depuis que nun ls biu !), la cara i l nome de ls candidatos que s’aperséntan por este ou aquel outro partido que eisiste hoije an Pertual, nestas eileiçones outárquicas que se ban a realizar daqui a poucos dies.

An Pertual cumo tamien an Spanha por eisemplo adonde tamien eisiste esse hábito, segundo me parece, cumo yá cheguei a ber i quando ye l’altura... Mas an França, nó! Ou de maneira defrente: só uns dies antes de la data de las eileiçones (todas eilhas), ye que son colocados ls cartazes cul retrato de todos ls candidatos sien eiceçon nua orde oufecial determinada depuis dun sorteio, an ciertos lugares de carácter público, mas de maneira bien mais discreta se acumpararmos essas práticas an tierras goulesas cun  aqueilhas que yá son habituales hai yá muitos anhos agora tanto an Pertual cumo an Spanha.

La rezon: poucos franceses, palabra d’honra, gustarien de ber an França, ne ls nuossos dies, na altura de las eileiçones, cartazes  tan grandes i a dar tanto nas bistas cumo ls que bemos an Pertual. Muitos acharien (la maiorie) esse procedimiento chocante, talbeç até suspeito. Porque se pensarmos bien: puode un outarca ser alguien amportante, naide bai a dezir l cuntrairo, mas al ponto de oumentar mais inda l’eimaige del para oucupar dessa maneira l spaço público?! Porquei? Nun ye el tamien  ua pessona cumo outra qualquiera, se furmos a ber? I nós ls cidadanos que acreditamos arriba de todo ne ls balores de la Democracie nun somos nós tamien amportantes i mais amportantes até se pensarmos que ye de nós afinal que depende la bitória de un solo... un solo ou ua sola que nun serie nada ou anton pouca cousa se nós tamien nun eisistíssemos ?!