I la fuonte!

 

 

Muorro-me  als poucos an cada fuonte

que a pouco i pouco agoniza,

an cada rana a scabar

a saber de  fresca drumida,

an cada sapo de piel sgretada

a saber de l´amerusura perdida. 

 

Muorro-me  als poucos

quando por ti passo,
freixo cun secura,

stendendo las raízes
a la tierra an chamas

i ardendo por drento

antes que seia tiempo

de las fuolhas fazéren çpedidas.

 

Ardo an chamas
i muorro-me als poucos,

ah!, se me  muorro
i que si me duol

 este morrer debagaroso!…

 

 Hai un reçumar lebe ne ls mius uolhos

que por falta de sal nun chega a lhágrima

i nun chega a auga

por le faltar ousadie.

 

 Hai un morrer debagaroso ne l beiral

adonde l nial chora

la ida de l´andorina.

 

Muorro-me als poucos neste tiempo

an que las pormessas nun m´alborótan,

 por çcrédito!

 

Muorro-me als poucos quando beio

 l barranco que para mi abrírun,

mas juro, nun deixarei

que me máten por anteiro!…

Cumo l freixo, la rana, l sapo, l nial!

I la fuonte!...