Alacraus

A la cunta de l nieto dun bezino que le gusta muito bichos, (an special daqueilhes que son mui stranhos, cumo fura-fenos, aranhones, alacraus, lagartos ….) astanho tenie cumo cumpormisso quando fusse a Zenízio traier-le un alacrau.

Cumo pedido de nieto, seia de l miu quier seia de ls mius amigos, ye ua orde, assi fiç, un die a la tarde, mesmo ne l rechico botei-me a caras al Barrocal, porque siempre me lhembro de ls ber porqui, até la Caleija Ancha, inda ba que nun ba, habie las selombras de ls freznos, mas apuis na ancuosta i ne l cabeço fui un martírio, un birar de piedras i calhaus, xeixos, lhajas i nien seinhas nien buraquito de tales bichos.

 Cumoquiera esta spécie yá s’acabou porqui, nun rejistiu al abandono (mas n’oupenion de ls que acá stan, ye que si ls hai, até me dezírun que ne l barrocal de Bilasseco era mais que cierto ancuntra-los).

Que an Lisboua hai muitos (stan nas bielhas madrigueiras, ancobados ne ls casarius de l Terreiro do Passo) esso sei-lo you, nun son bien alacraus, son assi a modos, mas pícan i pícan, dan ferronadas de muorte, que l dígan ls zampregados, anfermeiros, porsores, sriban, studantes, aposentados i muito outros deste paiç. 

Mas cumo las cousas son, quando era garroto, hai cinquenta anhos datrás, un pedido destes i you arranjaba ua cerronada deilhes, de ls berdadeiros, daqueilhes que alçában l rabo i nun stában cun meias medidas, ferronában an nós i na cria.

 Ls tiempos son outros, nun hai que lhamuriar, alhá andube ua tarde toda, dei buoltas i buoltas por todo aquel cabeço cheno de touças i fragas i nun bi nien rastro de tales bichos.

 Sobrou-me un munton de alhembráncias, que nestes momientos bénen al de riba, momientos que eiqui passei, cula cria ou cul ganado, solo ou cula joldra que eiqui s’ajuntaba, saquei alguns retratos a la celebre fraga (lhaja, nós an Zenízio dezimos fraga), porque era conhecida de todos, la fraga de l scorregadeiro, mas desta un die destes falarei, i assi tornei a casa sien alacrau.

I cun muita pena mie alhá tube que dezir al rapaç que nun ancuntrei nanhun alacrau, l que nun ye buono, puis ls rapazes d’hoije i de siempre, spéran de nós, ls mais crecidos, que yá somos  giente feita, cun spriéncia de bida que resolbamos ls problemas i quando nun l fazemos ye ua ziluson.

Nota: Barrocal, Caleija Ancha, son chamadeiros