Porque será que a las bezes sentimos que la berdade nun ye
la melhor seluçon? Porque será que ye mui fácele amanhar la berdade a nuosso gusto,
al nuosso modo, feitiu ou oupenion? Porque será que cada beç mais çfarçamos para
apuis eimitar aqueilho que nun somos? Porque será que nas relaçones que tenemos
culs outros mos ampenhamos i lhuitamos de spada afilada pula nuossa berdade ou
pula nuossa mintira?
-Haberá solo ua berdade?
Até quando na nuossa cabeça ye legítimo çconhecer que hai problemas,
i nun antendermos que para ls resolber hai que ls sponer, que ye preciso falar
deilhes!
Será que l mais de las bezes antendemos porquei hai
bioléncia, quier seia física ou eimocional!
An casa, cul
matrimonho ou culs filhos, ne l trabalho, nas scuolas, nos lares d’acolhimiento,
nas rues, nas anstituiçones! I que l mais de las bezes nós cumo personas bemos
i quedamos andrentes, cumo se nada fusse i até biramos la cara!
Que pensaran ls biolentados, séias homes ou mulheres, filhos
ou filhas, nuobos ou bielhos, probes ou ricos quando a la par de la bioléncia
béen la andrença de ls outros, cumo quien diç de la nuossa!
Hai quien diga i afinque ls pies que ne ls dies d’hoije la
bioléncia ye maior que dantes, que medrou nas redadeiras geraçones, será?
Ou será que hoije la zmascaramos mais ( i inda bien ) stá
menos amouchada, ye mais divulgada que era?
Ua berdade me parece bien cierta, mesmo que eilha seia
eigual, nun tenie rezon de ser, la bioléncia subre ls outros, subre ls mais
fracos nun ten rezon d’eisistir, nós cumo sociadade medremos, na cultura, ne ls
modos de ber l nuosso par, l nino, l bielho, l mais neçassitado,
l de fuora, medremos ne ls balores morales.
3 comentários:
Buonas nuites Faustino:
Sou de ls digo que ne ls dies d’hoije la bioléncia ye maior que dantes, que medrou nun nas radadeiras geraçones, mas si nas radadeiras políticas, que biolentan la cuncéncia de muitos pertueses por meio de çpedimientos, ampuostos i cortes (eimorales) de las pensones i outras medidas que cuntribuen pa l'oumiento de l númaro d'andebidados, de zampregados, d'ampobrecidos, …
Un abraço,
Leonardo
Buonos dies tiu Leonardo
Este miu comentairo, ye mais para dezir que an parte stou d'acordo cun bós, mas nun tiro nada a la crónica que screbi.
-Dezis que sodes de ls que ne ls dies d'hoije hai mais bioléncia i queilha ben porque las políticas son malas, mas esso nun justifica queilha medrasse, se assi fusse solo ls nacitados i probres ye que éran biolentos, mas eilha tamien ye feita por andenheirados.
-Quien sou you para nun saber que quando hai zampregados, giente que nun ten ua códia para poner na mesa pa ls filhos s'anraiba-se i queda da mal cul mundo, mas tamien beio por ende tanta giente que fala, fala mas ten l c... cheno, que bota an todo que stá mal, que se fai política mala, mas cuntina a dar upas aqueilhes que la fázen mala. Cuntina a dezir queluobras i lhagartos desta sociadade, mas que nun admite l'eigualdade, que nun admite ua sociadade de trabalho eigual paga eigual, que uns ténen todo mesmo nun sabendo l queilhes fazírun an to la bida, que riqueza criórun i outros nun ténen nada.
-Al lhargos de ls anhos dei-me cuonta que la bioléncia (haber muita ou pouca) ten muito haber cula cultura dun pobo, un pobo sabido, eiducado, nun se deixa scornar tanto, agarra l bui puls cuornos, nun lhiebas las cousas cun lhambidelas, ye atibo.
-A çpreziar ls mais de ls balores, cula çculpa de la crise, (i nunca squecerei queilha ye mala cumpanheira) nun s'eiduca nien porpara las nuobas geraçones.
-Abaixo la bioléncia, seia eilha ou tenga l'ourige que tubir.
Un abraço
AntonhoCarrasqueiras
Buonas nuites tiu Antonho Carrasqueiras,
Mui oubrigado por este buosso antressante comentairo que demunstra que conheceis bien esta queston de la bioléncia i qu'eilha ten ourige “na política mala” na anjustiça, na zeigualdade social, mas tamien “ten mui haber cula cultura dun pobo”.
Ye berdade que “un pobo sabido, eiducado, nun se deixa scornar tanto, agarra l bui puls cuornos, nun lhieba las cousas cun lhambidelas, ye atibo”. Por esso, para botar “abaixo la bioléncia, seia eilha ó tenga l'ourige que tubir” parece-me mui amportante melhorar l’eiducaçon de las nuobas geraçones i nunca perdíren de bista ls grandes balores porque se regen las sociadades pacíficas: de se ajudáren mutuamente, de se respeitáren, de se stimáren i de se sentiren respunsables uas pulas outras.
Un abraço,
Leonardo
Enviar um comentário