Talbeç inda seia pior que l tfff

Lhebei tiempo a decedir-me se bos falaba desta ourrenda falta d’eiducaçon.

Mas, i hai siempre un mas, quien diç l que le bai n’alma, nun peca i ye l que acuntece comigo, tamien sei que nun stou a dezir nabidade nanhua que nun seia conhecida de la maiorie de bós, nien tan pouco bou a demudar las cousas, mas se nun mos fazir mal a bós, yá quedo cuntento, porque para mi estes zabafos, son cumo spirros, até peç que quedo culs bofos mais anchos.

You tengo l questume de buolber a ler cuontas passado muito tiempo, até porque hai cachos an lhibros, puis alguns antrórun na mie bida cumo anciclopedias de la scrita i da la fala, que me son tan queridos i m’agarrórun dun modo que nun ten cunta las bezes que releio ciertas passaiges dessas cuontas.

Ua dessas cuontas que reli i reli fui “Jerónimo carteiro” de l lhibro de Alfredo Cameirão “TORTULHAS; Cuontas deste Mundo i de l Outro” adonde l ancansable carteiro ten que antregar ua carta a tiu Calabaças – Biúdo, mala sarna, a bibir solo, feitiu squemungado, assi i todo, arrecebiu-me cun buonas palabras ……… i cun aqueilha sue manha de cada cachico soltar ua cuçpenhadica – tfff – cumo se stubira a cuçpir tabaco manginairo que le tubira quedado ne ls beiços– (sitaçon de outror)

Ora, you até cierto tiempo cuidei que esta serie la manha pior de l mundo, nun gusto de ber, assi cumo cuçpir ou scarrar pa la rue adonde todos andamos, porque neilhas tenemos que andar, i s’un nun s’aporcata até las lhieba para casa agarras als pies.

Mas puro anganho l miu se esta ye la pior manha, outras hai que nun se quédan atrás,cumo falar pul telmoble ne ls trasportes ou outros lhugares públicos. Stá-se rebelando ua falta de respeito, ye de boziar al cielo, tenemos que saber la nuossa bida i la de ls demais, hai giente que l fai dun modo alto i tanto tiempo, stá-se rebelando ua falta d’eiducaçon. Ye causo para percurar adonde páran ls percípios de respeito puls outros que mos arrodéian, que quieren ler, seguir biaige an paç i assossego, que le gusta aporbeitar este tiempo fuora de l trabalho para matutar noutras canceiras de sue bida. Respeito, eiducaçon ye l pouco que podemos dar l mais de las bezes a quien anda a pie de nós, mas nó, hai proua de sobra i cuncéncia sana de menos. I todo esto por giente que ten buona cara i peç que arráman anhos de scuola, giente fina i fidalga.

Puode ser i ye berdade que cada un debe fazer l que le dir na gana, i esso you nun questiono, mas que l faga, neste causo loinge de mi, sien que you tenga que tapar ls oubidos. Nun se trata de proibir nada, trata-se d’eiducaçon, de balores. Hai-los que se perderán bien debrebe se nun ls zmascararmos, se nun dezirmos que mos anquemódan, se nun furmus atibos. La lhibardade de fazer cumo i quando quiero acaba quando ampeça la de ls outros.

Pronto, porqui me quedo, i las mies çculpas.

Ua buona manhana para todos.