PATRIMÓNIO IMATERIAL
.
.La Fundaçon Inatel ourganizou, an cunjunto cula Comisson Nacional de la UNESCO, un Ancuontro subre Património Cultural Eimaterial cul tema “Tradiçones que Biben”, que decorriu de 13 a 16 de Outubre, ne l Inatel, na Foç de l Arelho. Neste Ancuontro, las anstituiçones de la sociadade cebil tubírun l'ouportunidade para amostrar i apersentar l sou trabalho an termos de salbaguarda de l patrimonho cultural eimaterial, promobendo la reflexon i sensibelizaçon pa l tema. “Pertual ye un paíç riquíssemo an patrimonho eimaterial de l qual debemos tener muito ourgulho”, dixe Fernando Guimarães, persidente de la Comisson Nacional de la Unesco, acrecentando que “para alhá de l fado, outras tradiçones poderíen justeficar ua candidatura a Património de la Houmanidade”. Fernando Guimarães falaba a la borda de l'abertura oufecial de l'ancuontro. L persidente de la Comisson Nacional de la UNESCO dixe inda que “l patrimonho eimaterial ye un eilemiento fundamental de l'eidantificaçon dua quemunidade”. Neste ancuontro stubírun an debate bários porjetos qu'eilústran la “riqueza” de l “nuosso patrimonho eimaterial”, cumo, l studo de l causo de ls caramonos de Santo Aleixo (Ébora Alanteijo) i ls sonidos tradecionales de l Nordeste Strasmuntano, perserbados pul Centro de Música Tradicional Sons da Terra, de Sendin, an Miranda de l Douro.
1 comentário:
Buonas nuites Almenda!
Gusto muito deste tema “património cultural eimaterial”, que ne ls radadeiros anhos ten tenido abanços seneficatibos atrabeç de ls studos de l scritor i etnólogo strasmuntano Alexandre Parafita, natural de Sabrosa, Porsor i ambestigador de la UTAD.
Parafita cunsidra la necidade de çtinguir cumo património cultural eimaterial trés grupos de benes culturales:
– Ls géneros de lhiteratura oural tradecional tales cumo cancioneiros, romanceiros, cuntos populares, rezas, …;
– Spressones i manifestaçones lhigadas la rituales festibos, fés de l subrenatural, lhendas i mitos, stórias de bida…;
– Manifestaçones tales cumo trajes, jogos tradecionales, romaries, gastronomie, artesanato….
Parabienes Almendra pula dibulgaçon deste amportante Ancuontro subre Património Cultural Eimaterial que “ye un eilemiento fundamental de l'eidantificaçon dua quemunidade”.
Un abraço,
Leonardo
Enviar um comentário