Ampecei a oubir l biento

Ampecei a oubir l biento
l purmeiro biento deste Outonho
i pula purmeira beç
las purmeiras fuolhas de l anho
bi bolar

Todo esto tenie de acuntecer un die,
mas quien ye que querie acraditar ?
Era siempre cedo demais
anque todo yá steia talbeç screbido
nua fuolha…

Cumo todas las que un die nácen
agarradas a mil i ua arble
brílhan de mil quelores
son berdes
burmeilhas
amarielhas
i até azules
mas que depuis
un die
ampéçan a bolar
secas i lhibres
cumo páixaros que se pónen a sonhar
i a tener suidades
dun tiempo ido
i siempre curto
curto demais...

porque finalmente chegou l Outonho
i cun el este biento
este biento que sopra agora sien parar.