ASSI BAI LA DEMOCRACIE

Assi bai la democracie

Ne l nuosso querido Paiç

Que stamos siempre retrocando

Las palabras que l outro diç

Falasse tanto de democracie,

Por ende, a tuorto i a dreito

Mas siempre la praticamos

De la maneira que mos dá jeito

Todos tenemos dreitos de falar

D´eideias, que cada un ten

Mas son siempre reprochadas

Se la cousa nun mos cumben

Politiquices baratas

Que bal todo, i nun bal nada

Assi se faç na democracie

Se la cousa nun mos agrada

Cada un debie puder falar

An nome de la lhiberdade

Siempre que para esso

S´assuma la respunsabelidade

Hai que assumir respunsabelidade

De l que un screbiu ó falou

I un nun se star ampuortar

Se este ó aquel nun gustou

Puis nunca s´agrada a todos

Yá assi me dezie mie bó

Porque quergamos ó nun quergamos

Hai siempre algun se nó

Principalmente se l assunto

Fuor futebol, ó se fuor politica

Se la cousa nun cumben, faç danteira

I todo mos parece ua critica

Se las palabras son doutra quelor

Por mais pintadas que bengan

Nun somos capazes, d´aceita-las

Por melhores antençones que tengan

Nunca ye cumo nós falamos

Nien chequier cumo screbemos

Siempre mos acrecentan ua birgula

Aquilho que nós fazemos.

I nun debie ser assi

Democracie ye lhiberdade

I nun atirar-mos pals outros

La nuossa respunsabelidade

Respunsabelidades debiemos assumir

Miesmo habendo lhiberdade

I naquilho que deziermos

Tenemos que meter respunsabelidade

Se nó, nun hai democracie

I só criamos mais cunfusones

Se nun medirmos las palabras

Biraran-se todas an palabrones

I aumentaran-se las cunfusones

I assi yá naide s´antende

Ye esta la democracie

Que you stou bendo por ende.

Beio tanta democracie

Neste mundo tan perfeito

Mas cada un la proclama

Cunforme l dá mais jeito.

José António Esteves