Hai oulores, hai rius

Nun te chega l auga
De ls uolhos adonde nabegas
Nun te chega l oulor
De l jardin que nun berdega


Dan tropicones ls remos
De l tou barquito dalgeiro
Nesse riu
Que ye un filo de sequeiro


Habies de tener un mar
Adonde l´auga te bundasse
I un aire te lhebasse
Debrebe cumo l pensar


Nun se te sgúbian las manos
A sfregar esses canteiros
Muortos
Cun la secura de chanos

Habies de tener un jardin
Que t´amboubasse l querer
Que te lhebasse a nun saber
Al que cuidas saber de ti

Stan zbotadas las flores
I las fuolhas spintarroxadas
Ls tuoros quaixeque secos
Las raízes ambaranhadas