Ye ampossible un çpir-se de las sues bibéncias, de l sou passado.
Cumigo tamien assi acuntece, i nun quiero you dezir que solo m’arriben a la mimória las cousas malas, nó, tamien las buonas, depende de muita cousa, adonde stamos, de cun quien stamos de l nuosso stado d'animo, de l tiempo que fai i por ende alantre.
Nestes dies, porque ten feito un suberrolho de ls catanos por todos ls lhados, buono ye dezir que l que me reçuma mais a la mimória son ls dies de calma quando tenie la suorte d’andar pul termo de Zenízio, a birar i acarretar l feno, de las segadas, acarreio i trilhas de l pan.
You digo la suorte, porque bibindo agora nua cidade tengo outros trabalhos, la calor ye tamanha mas l aire que respiro, nun ye tan lhimpo, lhougo nun ye saludable.
Quantas bezes ne l que scribo i digo, deixei antender que l tiempo dantes fui un anfierno, porque mos criemos culs calçones rachados, la monca ne l nariç i robendo uns rascanhos, i ls nuossos tenien que fazer cumo diç l dito,“se quieres saber quanto custa fazer pul grano, arrinca piornos ne l eimbierno i xaras ne l berano”, tamien bos digo, l tiempo dantes ye un filme a negro i branco que nunca quiç apagar i muitas son las bezes que l relhembro.
Ne l miu rosairo de cuontas puode tener muitas de tiempos çfíceles, mas deilhes nun guardo sapeiras, la maiorie son de tiempos passados i acobilhados d’alegries i felcidade. L tiempo nun bolbe al para trás, i inda bien, se you atamei la calor i matei la sede, quando s’acababa l’auga na cántara, an lhagonas adonde las buiadas tamien l fazien, hoije yá nun ye perciso porque hai geleiras i garrafones d’auga tratada.
Tamien sei i era berdade que nessas temporadas de l anho, quando las lhabutas éran mais i mais penosas la maiorie de las pessonas até angordada.
3 comentários:
Ui que si se me antolha la segada!!
Bá, you saco las garanheiras i tu atas que la estalha yá bai lharga, nun baia a lhebantar-se l aire i apuis esparigen-se las gabielhas todas.
Abraço
You yá nun sei atar, apuis quando fur pa ls botar pa l carro sparrúlhan-se todos. Mas se ls benceilhos stubíren demolhidos talbeç rejisten al acarreio. I hoije l aire que fai nun dá cobradeiros de cabeça, mas stan buonas cundiçones pa las truniadas ou pulborinos.
Un abraço i até qualquiera die, se Dius quejir stá para brebe.
Buonas tardes Faustino,
Yera neste tiempo de muita calor que se fazien estes duros trabalhos de la segada. Parabienes por lhembrares esta lhabuita cun tan guapos retratos de la segada, cu ua guapa bechorra i un cântaro adonde se guardaba l' auga que atamaba la calor. Nun acradito que nun seias inda capaç de atar un manolho.
Un abraço,
Francisco
Enviar um comentário