La ceçon an sues faceiras

Hai dies an que ls mius dedos nun páran de mexer. Báten ne l teclado cumo se quejíssen sentir siempre cuçquinhas.
Mas hai dies an que ua tristeza ataca ls mius dedos. Apetece-l quedar parados i anrebulhados an lhençoles, lubas bestidas para que naide l percure dadonde bénen. Ende recusan-se a screbir i por isso muitos l mándan recados a percurar la rezon .
La rezon, bai-se a saber la rezon!
Hai dies an que l coraçon sinte ua solidon tamanha que ye cumo que nun ténga a la borda ls pulmones i l fígado. Ye cumo la giente quando bai a la Baixa de Lisboua, adonde todo mundo anda anraibado i mos parece que andamos solicos…
Feliçmente la mais de las bezes nun son dies mas si sfregantes, mas sfregantes an que la risa ne ls lábios duel, de tan anculhidos ls lábios stáren. Nien preliminares ls fázen çcuntrair, preliminares de palabras que anténtian la salida!…
Mas nesses dies sien sol, acaba por haber siempre un bulcon andrento de mi que ferbe, ferbe, cumo se fura un pote cun tapadeira citrada. Apuis, ua brecha se abre n´alma i bota pormeiro nubrina, apuis bapor a ferber para que la sploson nun seia mortal. Apuis als poucos bai salindo la laba, caliente, burmeilha. Ende, you arremeto acontra la solidon i l delor que até eilhi sentie, deixando salir las lhabaredas pula boca de l bulcon, alma abierta, peito cheno de paixon.
Angulho l bózio para que ls bezinos nun se assústen anquanto abro las portaladas, ls bidros i ls uolhos i la alma.
I bózio chega drento de l coraçon que agora ya bate na companhie de ls pulmones i de l fígado i ls mius uolhos miran, la mie alma siente las manhanas frescas de Outonho anque seia ua tarde de Agosto, sol a sturrelhar las huortas, l termo que pide milho. L´ourbalho que se formou naqueilhas aranheiras de Outubre amostra-me nessa secura de Agosto , miles de Cintas de la Raposa, cumo se fura ua tarde de truniadas, quelores que fázen sonhar ls mius dedos.
Apuis beio ua fuolha branca a bolar, suolta, adreitos a mi, a namorá-me, … i ls mius dedos nien percísan de perliminares para se soltáren an ourgasmos ne ls botones de l cumputador. Son modernos ls mius dedos, i an beç de ne la fuolha, bótan-se a búltio subre l cumputador, an bolúpia, sien camisica, perdidos de prazer para que náça un filho, que náça lhibre cumo eilhes se sínten, muntones de palabras sien parar, apuis que por sfregantes quedórun angaramunados, a las bezes por dies, cumo se yá nun tebíssen semientes para fazéren naçer más ningun filho.
Apuis que ls dedos apelíden nata an sues faceiras, ls filhos han-de naçer cun sue ceçon.