Fui onte (06/11/2011) l magosto tradecional

Mais un magosto de “Todos Santos”, porque assi ye conhecido zde siempre, de la quemunidade Zeníziense i amigos a bibir an Lisboua i alredores, pormobido pul’Asssociaçon Cultural i Recreatiba Nial de la Boubielha (ACRNB).

Mais un, i esso alegra muito, nun por ser mais un i oumentar la cuonta, mas si porque la tradiçon cumpriu-se, i porque a el bieno muita giente, i muita giente que ne ls redadeiros anhos, que por rezones que solo a eilhes diç respeito nun benien, i esso para alhá d’alegrar to l mundo, ye motibo de sastisfaçon nun só pa la direcion cumo para aqueilhes que nunca faltórun ber cunterráneos i cunterráneas que stában
arredados, tornar al cumbíbio.

Dezírun muitos que l mais de las bezes até nien se dá por eilhes, son reserbados i stá todo siempre bien “mira astanho fui un de ls que bieno muita giente i alguns que nun beníen hai muito” cumo ye guapo oubir cousas assi, muito mais para todos aqueilhes que le gusta star siempre arrodiado de giente, de cunterránios i d’amigos.

I apuis d’acá staren nun habie modo de las ampuntar, tubo que ser l scuro de la nuite, anton aqueilhes i aqueilhas que fazírun cerco (ruodra) a pie de l borralho que quedou de l assador de las castanhas, la calor i l apego a la cumbersa era tanto que nun ten pareilho, nun tenien ganas de s’íren, achórun que la tarde fui pequeinha de mais, las pessonas quieren cumbibir, quieren falar, quieren star an cumpanhie, desso nun hai dúbedas nanhuas, muito menos para mi que stou siempre atiento.

Todo esso se bei nas sues caras, stan felizes, cúntan cuontas, puoden ser repetidas, recuntadas mas son siempre nuobas, cumo nuobas se tórnan todos estes camaradas que rebíben ls anhos sessenta ou setenta de l seclo datrás, se rebíen a fazer magostos quando andában a ser buieiros i arrastrando l’ala a las buieiras, an Bincosa, Spadanhas, Canhada, Cerbeira i tantos outros sítios ne l termo de Zenízio.

You siempre botei, screbi i publiquei zde que scribo n’anternete la mie oupenion, i l que mais gustaba era que outros l fazissen, subre estes eibentos, i a eilhes hei de botar siempre l mesmo ferbor, porque antendo que para alhá de séren tradiçon son tamien un ato cultural i muito social, permite ajuntarmos-mos, ber i saludar pessonas que fuorça de las circuntáncias, porque la bida nas cidades ye madraça i rouba l cuntato culas pessonas, nun hai outro modo de l fazer.

I a miu ber, todo l que se faga, reponendo las tradiçones, ls jogos tradecionales, ls ancuontros, ls almuorços, las ouportunidades de se falar mirandés, zanferrujando la lhéngua, agora muito mais son necairos, porque ls afetos, la stima pul outros arrefece to ls dies.

Mas la bida ye assi mesmo, ben quien quier, puode i gusta de cumbibir, porque a la direcion solo cumpete purparar todo cumo l ten feito, ls associados, familiares i amigos esses ténen cun eilhes l don d’acalorar ls ajuntouros i a eilhes dar cula perséncia aqueilho que naide puode dar por eilhes, la cumbibéncia.

I naide dixo até pa l anho que ben, porque todos sáben que l “Dous de Febreiro” la fiesta de la Senhora de las Candeias, fiesta tradecional de l’aldé de Zenízio nun tarda muito, l “Purmeiro de Maio”, die de ls jogos tradecionales tamien nó, i inda pul meio hai yá marcadas i haberá muitas manifestaçones cun salimiento de lhibros i atebidades culturales lhigadas a la lhéngua mirandesa, adonde la nuossa quemunidade marca siempre muita i atiba perséncia.

Bien haia, i saludos Zenízienses para todo l mundo.