.
MAGUSTO AN MAÇORES - MONCORBO
.
.
Apuis de l'eucaristie i de la procisson, de la fiesta de S. Martino, an Maçores, Moncorbo, las pessonas reúnen-se, normalmente ne l Lugar de la Eiras, pal tradecional magusto. Son trazidas las castanhas i la palha que serbirá pa las assar. La palha ye spalhada ne l suolo i las castanhas deitadas subre la palha. Acende-se la fogueira i ampéçan-se a assar las castanhas. Assi que las purmeiras castanhas stéian assadas, ls partecipantes aprossíman-se de la fogueira i ampéçan a comé-las.
.
.Durante l magusto, stan persente ua caldeira chena de bino i l gaiteiro. L gaiteiro toca las tradecionales músicas de S. Martino i todos ténen que buber de la caldeira. La fiesta cuntina cun un saudable cumbíbio, culas pessonas a pintáren la cara uns als outros, culas cinzas de la fogueira, acabando todos cula cara "anfarruscada" ó "anfurretada", cumo se diç na aldé. Por fin i para aqueilhas pessonas que nun podírun star persentes, ínchen-se sacos de castanhas assadas que ls homes lhíeban al ombro pulas rues, i que ban çtribuindo, acumpanhados siempre pul gaiteiro i pula caldeira de l bino.
.
.Quien come las castanhas assadas sabe que nun puode deixar de cumprir la tradiçon, que ye buber de l caldeiro.
.
.
.Astanho las músicas fúrun grabadas pul Mário Correia, de ls “Sonidos de la Tierra” de Sendin, para eiditar mais tarde un CD, que quedará cumo mais ua recuolha de la música tradecional de la nuossa region.
3 comentários:
Buonas nuites Almendra!
Gustei desta çcriçon de l Magosto de Maçores, un de ls mais ouriginales de la nuossa region strasmuntana.
Gusto destas fiestas cun gaiteiros, cula caldeira de zinco çpindurada ne l meio dua bara a dar la buolta a l'aldé, d'adega an adega até la anchir de bino, an que nuobos i bielhos meten la cabeça na caldeira para sorber l bino, qu'assan las castanhas cun palha i que se anfarruscan cula cinza, cun alegrie, bilhós i bino a la ringalheira.
Yé un Magosto cun grande sprito d'amisade, de brincadeira, d'ounion i de special fraternidade, porque ne l fin de l Magosto ls moços percorren todas las rues de l'aldé para çtribuir castanhas a aqueilhas pessonas que nun podírun star persentes ne l magusto.
Parabienes a toda la populaçon de Maçores por mantener biba esta tradiçon i a ti Almendra por esta dibulgaçon de tan guapa fiesta pa la nuossa region strasmuntana.
Un abraço arrochado
Leonardo
Buonas nuites Leonardo,
La mie çcriçon ye a modos de un jornalista que dá la ambora, mas gustei de l tou comentairo, parece miesmo que ibas atrás de l caldeiro i beniste eiqui a cuntar cumo fui. Mas tamien quedo cuntento porque beio que las mies amboras fázen cun que quien las lei se sinta na sue tierra.
La nuossa lhéngua yá atingiu la maioridade, yá ten de todo. Nun hai que tener miedo de la deixar ir por ende. Sei que custa deixar salir un filho de casa, mas nien l pai puode querer tener siempre ls filhos an casa, nien ls filhos púoden star siempre atenidos i a mirar pal pai.
Un pai que renhe cul filho nun quier dezir que l'ame menos, assi cumo l filho que refila, nun quier dezir que nun guste de l pai.
Abraço
Almendra
Enviar um comentário