Bien benido!!!

Acarineste-me l rostro cun un airico, assi que sali. You beisei ls dedos i mandei-te beisos cun un assopro.

La manhana era caliente cumo qualquiera manhana de Berano. L sol saliu relhamposo i, anque cedo, l mar tenie burdascadas de lhuç anriba de las óndias. Las gaibotas sbolaciában i al miesmo tiempo dában chafurgos cun la cabeça andrento l´auga, para pescar algun peixe inda drumenhuco.

Habie giente na arena i, las splanadas ancomeçaban a quedar cumpuostas: uns a buer l café de la manhana, outros a deseiunar-se, outros inda, a ler l jornal anquanto ls farrapos d´ir a banho se íban secando.

Sintei-me acerca ua mesa i atei la riata de la perra a ua pata de la cadeira d´alumínio. Botei ls uolhos cumo quien nun quier l cousa pal jornal dun bezino i fui lendo al menos las lhetras gordas. Lhougo arriba, “ la Grécia bai a tener muita deficuldade an cumprir l treminado, " por bias disso, Pertual scálha bai a tener que pedir outro çambon d´oussílio”. Malas amboras, pensei you. Buí l café sien açúcre, nó por bias de la crise mas por modo de questume a l´amargoso.

Un pouco mais parriba abistei un jardin, pulmonico de la cidade. A las bezes nien sei cumo amánhan fuorça aqueilhas árboles para resfolgar i fazer sue fotossíntese, de tanto fumo andar ne l aire!

Alguas árboles inda sigúran la quelor berde, eiqui i acolhá ua folhica yá amarielha. Outras stan  quelor de laranja, aqueilha quelor que fai chiçpas de lhuç quando l sol l bate. Las fuolhas lhuitan para se mantenéren agarradas al cherume de ls galhos, retardando todo quanto puoden, la sue caída. Apuis que caíren, la manga chupa-las i, cuitadas, alhá quédan sien denidade naquel foio scuro. Siempre ls bardeiros éran mais amigos de las fuolhas quando l barredor las miraba i dezie: folhicas, bós sodes l miu modo de bida; que serie de mi se nunca bós caírades? Morrie-me de fome, sien outro modo de bida… Beni eiqui!, you nun bos amarfanho.

Cun la manga a chupar son smagadas i anrebulhadas i, ye un çcanso quando se béian na muntuneira a fazéren-se an stierco.

Las roseiras inda ténen rosas, nien parecendo que l berano acubriu la Primabera.

La mie perra mete cumbersa cun todomundo: Alhebanta-se i meneia-se para ber se alguien l fai festicas.
You yá acabei l café, l miu bício, un beneno pa la tençon alta. Mas que se bai a fazer… Un bício pouco ye, neste mundo crabiado de antulhos.

L sol yá caldiou las piedras de l ampedriado. Ls surfistas yá chúben las óndias an remissacos, outros nun abántan la fuorça de l mar i barímban, outros ban de cachafun pa l´auga.

Abro le lhibro na paigena marcada pul papel, relheio la redadeira para agarrar baláncio a la stória i cuntino la lheitura de Berano, neste die que dei las buonas benidas al Outonho.

Por sfregantes fui a la binha adonde colhi las ubas de rei, cheirei ls doces de cereijas i moras na çpensa, comi moras nas silbeiras, chacualhei l´augardiente i bieno-me l oulor a poeijos i a fuolha de figueira, de molho para apuis fazer l licor pal tiempo friu. L diospireiro cargado, cun diospiros a quedáren cun quelor de maduros. Apuis que la calor se báia, nien eilhes amadúran de tan atrecidos ne ls galhos znudos.

Quedei a mirar l nada, persumindo este pormeiro die d´Outonho cun benas por adonde cuorre l sangre de Berano.