BIAJANDO PU L
CARRIL MOURISCO
Biajando pu l Carril Mourisco
Passei horas belas na bida
Cu las gientes que ancuntraba
A dar-me la bien benida.
Atrabessando por todo l praino
Bendo aqueilha guapa paisaige
Quedei ancantado culas gientes
Que trabalhában cun curaige.
Que trabalhabában cun curaige
Lhabrando aqueilhas prainadas
Que depuis de sumiadas de trigo
Ye que mos dárien buonas segadas.
Segadas por gientes houmildes
Dobradicos subre la stalha, andában
Cu l sol sturricando ls quadriles
I que para trás manolhos, deixában.
Quando buolbi para trás
Yá culas segadas acabadas
Anton puode apreciar
Aqueilhas grandes bacadas.
Aqueilhas grandes bacadas
Que andában naqueilhes restrolhos
Inda cun muita giente
Acarriando ls manolhos.
Carregando ls manolhos ne ls carros
Cu las bacas mirandesas a puxar
I l carro bien carregado
L pan pa las eiras a lhebar.
I you segui mie biaije
Bendo aqueilhas prainadas
Apreciando la beleza
Cun todas aqueilhas bacadas.
Que todas aqueilhas bacadas
Éran de raça mirandesa
Que l dában aqueilha paisaige
Muita, mas muita beleza.
Grandes ganados de canhonas
Cun pastoras i pastores
Andában por aqueilhes campos
Cantando cantigas d´amores.
Las cabras nun bie puoli
Por isso nun bie la cabreira
Bie ls burros carregados d´alforjas
Fazendo ua grande roznadeira.
Lhebában quemida pa la lhida
Ó la semiente pa la sementeira
Ó anton iban a Dues Eigreijas
Que era l die de feira.
Ó anton éran ls Sendin
Que d´alhá nun hai quien ls saque
Que iban a la feira de l Naso
A bender la alforraque.
Fússe quien fússe que passasse
Beniesse el daonde beniesse
Ancuntraba siempre puoli
Quien la bienbenida l disse.
Giente houmilde i trabalhadeira
Que andában ne ls sous afazeres
Ambelezando la paisaije
Para tu passares i la beres.
Era assi l Carril Mourisco
Que l praino mirandés atrabessaba
Que l daba tanta alegrie
A quien por eilhi passaba.
José António Esteves
Sem comentários:
Enviar um comentário