Tagalhos

Un tagalhico de canhonas, an san Pedro, trás de las casas de l Trufal.

Trasdonte, you stube nas Arcas, que ye un pobo de l cunceilho de Macedo. La cousa más coincida de las Arcas talbeç seia l Solar, mas pulhi hai muito más que ber.
Stábamos alhá de cumbersa, ua meia dúzia deilhes, bai quando nó, diç un falando de la bida que habie tenido:
- (…) e também tinha um tagalhito de ovelhas.
You siempre le procurei: bós quei dezistes? I pus claro que le procurei an grabe, agora eiqui ye que l pongo an Mirandés, por bias de ser eiqui.
- Que tamien tenie ua dúzia de canhonas.
- Nó, nó, bós peç que habiedes amantado an “tagalhito”…
- Ah, pus dixe….”tagalhito” ó “tagalho” quier dezir uas pouquitas de canhonas.
Buono, para ancurtiar la cumbersa – esta cumbersa eiqui, que la de las Arcas dou para un cacho – puodo-bos dezir que eilhes úsan la palabra “tagalho” tal i qual nós la ousamos an Miranda, tirando-se que eilhes dizen “atagalhar”, cumo tal, quando l lhobo “atagalha” l ganado (lo debide an cachos más pequeinhos) i nós dezimos, al menos an San Pedro, “zatagalhar” l ganado, quando se strampalha an tagalhos.
Anté eiqui hai pouca nobidade, que you bien sei que hai muita palabra que un cuida que ye solo Mirandesa, i quando se bota de cuntas aparece por todo l lhado. Al menos an Alfándiga tamien se diç tagalho, tal qual, de maneira que nun deixará de ser un de ls tales regionalismos stramuntanos que stan siempre a aparecer.
Assi i todo, you nun sosseguei que nun le procurara:
- Mas i anton tagalho puode-se ousar cun canhonas, cun pessonas i assi… mas cun bacas nó, ora nó? Ó tamien se puode dezir un tagalho de bacas…
- Nó, de bacas nó.
- Yá bistes - acrecentei you, assi mei a mo’doutor de scanho – las palabras ténen muito que se le diga… el porquei nun se ousará tagalho para amantar an bacas…
I diç-me tiu Felisbino, de riba de la sabedorie de ls sous 65 anhos:
- Oh home, i anton datrás adonde staba quien tubira más que ua junta de bacas?! Nien l ricos se botában a tener “tagalhos” de bacas… cumo quereis bós que se amantara an tagalhos de bacas?!
Toma, Alfredo, pega i agarra-te! Para quien iba por “saberes não conceptualizados”, yá troixe que cuntar.
Agora nun sei an qual gabeta lo hei de meter, mas se bós antandeis que isto nun ye cunhecimiento de pragmática de la lhéngua, dezi-me anton bós l que ye.