Torno a dezir: nun son capazes de antrar! Nun hai Americanos an Bagdade!
Este home chama-se Mohammed Saeed al-Sahaf - ou chamaba-se, que you nun se me lhembra al cierto se tamien lo acuchichórun - i yera l Menistro de la Anformaçon de l Eiraque, durante la guerra cun ls americanos - esta redadeira.
Cumoquiera que bos lhambrais del, a anteimar para la talbison que ls amaricanos nun íban a ser capazes de antrar an Bagdade, quando eilhes yá quantá que habien sbarrulhado l portielho i stában fartos de saltar ls silbeirones an buolta de la cidade.
You, nestes últimos tiempos, ten-se-me lhembrado muito l home, mormiente ne l ampeço de ls telejornales, quando beio quemantar alguas cousas que se pássan.
Isto de ne ls stados democráticos, cumo l nuosso, nun parecer bien haber un menistro de la Anformaçon - ou de la Porpaganda - ye un porblema i ua carga de trabalhos: cumo l serbiço nun puode quedar por fazer, apuis toca-le a todos a fazer un cachico de la parte, i un home que ande çperbenido, cumo you, nunca sabe bien se stan a falar a sério ou se ye... para fazer la parte!
Al menos cun l tal al-Sahaf sabie-se al que benie, assi...
Buono, cumo se trata eiqui de cunfusones i de nun se saber mui bien cun l que se puode cuntar, you fago la parte de Otábio Machado i acabo cun ua tirada a que boto siempre la mano nestas cousas: Bós bien sabeis de l que ye que you stou a falar!
2 comentários:
Caro Tortulhas
Todos sabemos de l que stamos a falar. La Stória un die fará la stória desta guerra. Qualquiera un que nun steia aporcatado, tenerá siempre muita deficuldades an antender cumo la rudra de l tiempo ampeça a desandar i camina pal abismo. Agora parece que ua lhuç ne l fuondo d´l túnel se ampeça a ber. Mas l´aire que sopra nun sei se nun la apagará. Todos ls seres houmanos fazimos fuorça para que la rudra rode ne l santido cierto. Quir parcer que nun haberá outro camino que nun seia l de la tolerâcia, sien çquecer la distribuiçon mais eigual de la riqueza. Palabras, palabras, mas todos sabemos de l que stamos a falar.
Válter Deusdado
Buonas nuites
Acá para mi tamien stais cume l propagandista de las colchas na feira de l Naso: fala de trapos mas l que él quier son notas.
Nun bedes que agora para runsiar l carro, la ruodra de drento yá nun fai poça cume cul eixe de palo! Todo más fáçl ... anté ambolcar la carga c'un rudión de las mulas.
Abraços
Enviar um comentário