16/11/08

Las mies dues porsoras



[Crónica salida ne l jornal A Voz do Nordeste, l die 13 de Nobembre]


Nó, nun bou a falar de las manifestaçones de porsores, nien de la sue abaluaçon, nien de las dues culidades de porsores que criórun, nin de l statuto de la carreira, nin de ls hourários, ou de l’amportança de la scuola i de ls pais, i de las outarquies, i de todo esso que agora tanto se fala, i fala, i fala. Bengo solo a amentar nas mies dues porsoras de la scuola purmária, Maria Luísa, na 1ª e 2ª classes, i Maria de Jesus, na 3ª i 4ª classes (1957-1961). Cuido que dambas a dues stan bibas, la purmeira a bibir an Bergáncia – i tube un grande gusto an la ber eiqui hai uns dous anhos – i la segunda cuido que bibe an Miranda, nunca mais la bi apuis de salir de la scuola i, pula cierta, yá nin se lhembrará de mi, cumo ye natural.

Nun falo deilhas para dezir marabilhas, romántico, cumo a las bezes se faç de modo mintiroso – ah! cumo éran buonos ls porsores d’antigamente! i outras baboseiras assi -, que nun ye essa l’eideia que guardo deilhas. Inda bien que nun se me lhembra specialmente de cousas amportantes que eilhas háian feito, pus esso, cuido you, quererá dezir que mos deixórun crecer i mos ancaminórun – i por mi sei bien l muito que m’ansinórun -, nun tiempo an que nada era fácele i an que la 4ª classe era tenida yá cumo muito studo. Ua miséria de tiempos, uns tiempos de miséria!

L que se me lhembra, ye duns garoticos probes, muita beç çcalços i chenos de moncas, las bien remendadas i presas por ua sola alça, muita beç a trabalhar antes i apuis de la scuola, culs mais atrasados a quedar nas carteiras de la punta de trás de la sala, squecidos i a lhebar, cun muitos a repetir tanta beç la classe que até yá parecien mius pais i, an casa, l mais de ls alunos nun tenie a naide que soubira ua sola letra que l’ansinasse a la lhuç de la candeia. Ye berdade que la régua i la bara se sponien cumo un quadro afamado se spon nua parede, mas éran ls nuossos pais ls purmeiros a dezir, A Senhora porsora chegue-le a ber se aprende i se faç un home!

Hoije, mirando al para trás, stou cierto que la 4ª classe desse tiempo nun mos ansinaba mais nien mos purparaba melhor pa la bida do que agora. Na fin de l anho, ls dedos dua mano sobrórun para cuntar ls que cuntinórun ls studos, subretodo ne l seminário. Stábamos an 1961, ampeçaba la guerra i la eimigraçon, que un a un fúrun lhebando an sue mundiada. Dende para acá demudou l mundo, para melhor i muito: nun relampo, passou zde l’eiddade média a l’eidade moderna. Ne ls aliçaces de l nuobo mundo stan tamien, a la par de outras, las mies porsoras – deiqui le digo a eilhas que tengo essa certeza -, nó por séren strourdinárias, que esso ye algo que nun se puode eisigir a naide, mas solo por séren porsoras.

L nuosso paiç, an qualquiera bilica i cidade, stá cheno de menumientos als muortos de las guerras i al suldado çcoincido. Talbeç lo haba, mas nun sei de nanhun menumiento al porsor çcoincido, esse que tanta beç se quedou cumo nun campo de batalha, que se lhemitou a ser porsor toda ua bida, quier dezir, que colou ls dies cun remiles de pequeinhos feitos, sin que un solo deilhes recenda a heiroismo, mas todos juntos dan para demudar l mundo. Pena que solo mos déiamos de cuonta muitos anhos apuis, porque l ansino de hoije chama ls dies de manhana: stranha sociadade la nuossa que gusta mais de le fazer menumientos al sangre i a las guerras! Eiqui queda la mie houmenaige, simprez i talbeç tardie, mas nada será pior do que l silenço: sei que eilhas nun la percísan, mas, quando l eimbierno aperta, un ten de se calcer an qualquiera fogueira.

amadeujf@gamil.com




2 comentários:

Boieiro disse...

Buonas nuites

An quatro anhos, de la purmeira a la quarta, coinci cinco pursores (as) an dues scolas! De quatro inda sei l nome i m'acuorda la cara: pursor Celestino; pursora Adelaide (péç-me que de Caçareilhos); pursora Céu (Mogadouro?); pursora Adelaide, que tube la maior alegrie de ber astanho l die de la Lhuç passados más de trinta i cinco anhos.
L menumiento a eilhes ye acrecentado todos ls dies de cada béç que ls "sous ninos (as)" botan meia letra a amantar neilhes. Poderán nun tener sido ls melhores pursores de l mundo, mas por cierto mos dórun l melhor que l sou mundo tenie.
Menumiento an piedra i cal alhebantóran "nuossos abós" quando fazíran ua scuola para un pursor que naide cuincie mas que haberie d'ansinar ls nuossos pais i aspuis a nós. Inda stá alhá cume centinela, a abraçar un lhugar, bafiada todo l die pul sol i c'ua moreira de teçtemunha.
Eiqui:
http://www.photoblog.com/Boieiro/2008/10/10/la-scola-de-l-pobo.html


Abraços

AF disse...

Buonas nuites, Boieiro,

Gustei de las tues palabras i de l modo cumo tu beis esse menumiento. Mas se se podisse ber tamien culs uolhos, nun quedaba mal.

Un abraço,
Amadeu