Hai uns meses, li un testo de Pedro Rolo Duarte, an que el lhamentaba que nun eisistíssen mais "jornais de referéncia". You cuncordo cul sou lhamento, mas sou un cachico mais pessimista: para mi, nun hai, an Pertual, ningun "jornal de referência". Hai jornales que porméten tratar ls assuntos cun perfundidade, rigor i seriadade, mas stan loinge de cumprir la pormessa.
Dou aqui dous eisemplos. Hoije li nun suplemento ua anterbista al realisador de l filme "La Muorte de l Senhor Lazarescu". La antrada dezie que este filme chegou la sumana passada a las salas pertuesas. Nun ye berdade. Este filme chegou a las salas pertuesas, anserido nun festibal de cinema romeno, an júnio (más anformaçones aqui i aqui).
Mas un erro mais grabe foi nua páigina an que se falaba nun nuobo lhibro subre la bida de Snu Abecassis. Al lhado de la notícia, habie un retrato cun Snu Abecassis i Francisco Sá Carneiro i cun lsdezires: "Snu Abecassis i Mário de Sá-Carneiro".
Se isto ye jornalismo de referéncia, mais quiero ler l "Destaque".
1 comentário:
Gralhas i erros siempre houbo. Uns de perpósito outros de einatençon ou por ignoráncia. L que ye amportante ye oubir i ler l que dízen ls outros ou até nós próprios daprendendo tamien a ancuntrar esses erros i sabendo tamien tener spírito crítico an relaçon als outros mas tamien a nós próprios.
L outro problema que hai, parece an Pertual, cumbenci-me desso faç agora uns dies, ye la percentage de ampregos ne l setor de la Cultura que faç parte, segundo la Eurostat – l gabinete de statísticas de la EU- de las dues mais baixas de toda la Europa. Essa percentage an Pertual ye precedida apenas pula Roménia.
Quando ye que se quier apostar na Cultura anton nesse Paíç ?
La lhéngua Mirandesa, a las tantas, tamien debe de ser ua bítima direta dua maneira ou doutra de l zanteresse talbeç quaije generalizado nesse Paíç por aqueilho que talbeç deia al Home ua dimenson outra que aqueilha que ténen ls alimales... Essa cousa que se chama: la Cultura !
Enviar um comentário