ANTRE XARAS
Ua xara de seda branca an muntanha
azul zenhada. Cumo quem alhebanta un eidial
na lhina de l´ hourizonte. Un xambre berde,
bandeira de çprança. Folgo de bida,
anque znortiada. Caminamos siempre berdes
an madura senara: nunca antendemos nada.
Acraditamos an eidiais que stan sempre mais alhá,
cumo xara branca an lunjuras d´azul - angurriada.
4 comentários:
l branco, l berde, l azul de l cielo, todo se ambolbe an lhuç, quelor i oulor de sprança nesse nuosso praino de lhembrança. Lhembrança para mi, claro.
Guapo.
Hai xaras an tou peito
flores brancas
cun cinco pintas
que se rien,
cumo poçaquitas an tou rostro
Hai fuolhas berdes
a colar mirares
al cielo doce de tous uolhos
I hai nubres brancas
cama dóndia
adonde ls mirares se deténen
pousados ne ls eidiais
que te susténtan
Tan brancos!
Tan berdes!
Un beisico, cara amiga
Si Antonho, dá gusto caminar antre las quelores i oulores de l praino mirandés.
Bien haias Antonho.
Buonas nuites.
Beisicos.
Até parece que beio las poçaquitas an tou rostro, cara amiga Delaide. :)
Oubrigada por este tou guapíssemo poema.
Beisicos.
Enviar um comentário