Hai amor a la lhéngua

 

La classe de mirandés de la Associaçon de Lhéngua Mirandesa, an Lisboua, acabou l anho. Fui la Casa de Trás ls Montes an Lisboua la nuossa scuola. Hai alunos que fui la purmeira beç que tubíran classes de mirandés, outros que son repetentes i a todos le gusta muito daprender l mirandés. Somos todos pertueses: alantejanos, leirinenses, lisboetas, stramuntanos i mirandeses. Mas que grande familha.  

L anho findou i hai cena. Alguns houbo que nun yeran de la classe mas que tamien fúrun a la cena, bundaba le dezir dues palabricas na lhéngua mirandesa i yá tenien la garantie de antrada na classe pa l próssimo anho. 

Hai l amor a la lhéngua. La cena fui an casa de Patrícia i Nuno, nacidos an Lisboua mas filhos de stramuntanos, eilha de Parada de Anfançones i el de Picuote. L anho atrasado ls dous fazírun parte de la classe de mirandés. Astanho Patricia nun puodo. La sue nina bai para un anho de eidade i creciu na barriga de sue mai a oubir la lhéngua de sous abós. Agora la nina ten arrimado a un anho i cun tantas madrinas i padrinos  bai pula cierta daprender a falar la lhéngua mirandesa.

Solo tenemos que dezir bien haia als porssores Amadeu Ferreira i a Fracisco Belharino pul tiempo i çponibilidade que ténen para mos ansinaren la lhéngua i la cultura mirandesas. Todos bamos ficando un cachico mais anrequecidos. Hai que dezír que naide paga seia l que fur para daprender i que la Casa de Trás ls Montes çponibliza la sala sien recebir nada por esso. Assi se bei la buona buntade de todo l mundo.

22/Jun/2012

António Cangueiro