PIC.NIC CONTINENTE 2012, grande pormoçon de cultura mirandesa

Tantas bezes you passo pula Praça de l Comércio an Lisboua, de quemércio yá lo terá sido, agora solo la Státua de D. José I anrriba de seu cabalho a mirar l riu Teijo. Mas hoije, die 16 de San Juan quando se ampeça a antrar andrento la Praça quaijeque mos bemos a antrar pula feira de l NASO ó ne ls Grazes de Sendin ó de Mogadouro hai uns anhos atrás. Canhonas, cochinos, cabras, cabalhos, bóbedas, berças i tantas outras cousas... apuis altefalantes ó solo falantes, a falar i a amostrar sues danças, sues músicas, la cultura de Pertual. Einiciatiba pormobida cul nome de PIC.NIC CONTINENTE 2012.

Ua jornada de grande pormoçon de la nuossa lhéngua, de la nuossa cultura i de la nuossa tierra i sues gientes. L grupo Galandun Galundaina apersentou sues modas; ls dançadores de Palaçuolo beilórun sues danças i amostrórun sous traijes tradecionales, l grupo de danças mistas de la Mirandanças tamien fizo las sues atuaçones i assi se mostrórun a todo l mundo.

L Workshop de la lhéngua ampeçou arrimado a las dieç de la manhana  i solo ancerrou ende pulas cinco de la tarde, sien anterbalo para almuorço. Purmeiro foi Deimingos Raposo almuorçar i apuis fui you i la mie tie: ua sande de pasta de atun cun ua auga i un café oufrecida pula ourganizaçon. Nun houbo dreito a puosta mirandesa que terie benido mesmo a calhar.

A la purmanhana,  Deimingos Raposo, porssor de lhéngua mirandesa na Scuola de Miranda de l Douro,  alhá le iba falando als curjidosos que se íban arrimando. Muitos anteressados quedaban-se bastante tiempo a oubir i you cuido que hai cada beç mais pessonas anteressadas an saber cumo se diç, cumo se fala i porquei ye lhéngua.

Amadeu Ferreira, scritor i ambestigador de la lhéngua mirandesa, stubo alhá toda la manhana, que outros afazeres nun le permitírun star alhá pula tarde,  a çtribuir  folhetos cun l "Belhete de Eidentidade", l' anformaçon eissencial subre l mirandés. Por todo l die fúrun çtrebuídos 600 folhetos, subretodo por mi i pula mie tie. L mais anteressante yera ls garoticos que se arrimaban a querer saber cumo se falaba i se screbie la lhéngua mirandesa.

You stube  alhá todo l die i puodo dezir que me gustou muito ber l anteresse que las pessonas ténen pula lhéngua mirandesa. Curjidosos, stramuntanos, alantejanos, algarabius, stranjeiros i muitos ninos que quejírun daprender a screbir i a dezir uas palabricas an mirandés. Brasileiros mui anteressados an oubir dezir uas palabricas mirandesas i ls poucos lhibricos que eilhi teniamos para amostrar quejírun cumprar. Stranjeiros casados cun pertueses tamien por alhá passóran i mostraran anteresse an saber mais algua cousica.

Ls mirandeses ténen que antender que ye muito amportante amostrar que las sues danças, la sue lhéngua  ye ua grande riqueza i que ls ourganismos ouficiales ténen que fazer un sfuorço para apoiar todo l trabalho que muitos fázen sien querer nada an troca i quando hai pessonas çponibles para dar muitas horas de sues bidas i cun saber i balor, essas pessonas ténen que ser acarinadas i apoiadas. Nun son eilhas que stan a ser apoiadas mas si algo que l pobo mirandés trai agarrado. Deixar essa ardança a las geraçones mais nuobas ye un deber de todos nós.

Pessonas que passóran alhá, principalmente porsores me dezírun que l Ministéro de l' Eiducaçon habie de promober la dibulgaçon de la lhéngua mirandesa ne ls manuales de pertués. Digo you que ua solo páigina bundada. 

António Cangueiro 

Jornal Nordeste, La Fuolha Mirandesa - 26Jun2012