20/06/12

Ls cerradores


retrato "amprestado" pula Cámara de Miranda

Diç que mos ban a mandar cerrar l Tribunal de Miranda, i ambora mandar cerrar cousas an Miranda yá quaije nun seia nobidade ne ls tiempos que bibimos, you, quando oubo amantar an cerrar cousas na nuossa tierra, lhembra-se-me siempre un testo de Saramago, que yá nun ye d’agora, mas bien podie ser. Ora, tirai-le “pribatizai” i ponei-le “cerrai” i a ber se nun stá un recado mesmo a la moda pa ls "cerradores"


"A mi parece-me bien. Pribatizai Machu Picchu, pribatizai Chan Chan, pribatizai la Capielha Cistina, pribatizai l Pártenon, pribatizai l Nuno Gunçalbeç, pribatizai la Catedral de Chantres, pribatizai l Decimiento de la Cruç, de António de Crestalcore, pribatizai l Pórtico de la Glória de Santiago de Cumpostela, pribatizai la cordelheira de ls Andes, pribatizai todo, pribatizai l mar i l cielo, pribatizai l’auga i l aire, pribatizai la justícia i la lei, pribatizai la nubre que passa, pribatizai l suonho, mormiente se fur pul die i de uolhos abiertos. I,al fin, para ramalhete i arremate de tanto pribatizar, pribatizai ls Stados, antregai la sploraçon deilhes a ampresas pribadas, cun cuncurso anternacional. Ende stá la salbaçon de l mundo… I, de camino, pribatizai tamien la puta que bos pariu a todos."

José Saramago, Cadernos de Lanzarote III




13 comentários:

Unknown disse...

Saramago nun me ínche l'uolho, mas este testo ye admiráble!

ACangueiro disse...

Saramago agarrou-me cun l lhibro: "Levantado do Chão"; spurmentai Tiu Almendra que acho que ides gostar. Apuis tamien screbiu muitos que me nun gustóran.

Unknown disse...

Antonho,

You yá lie Saramago antes de l 25 de Abril, "Isabel da Nóbrega" fui quien l'ajudou al percípio. L Circulo de ls Leitores tamien fui amportante para l feturo del, mas you nunca sei nada.
Isabel da Nóbrega tamien fui amportante para l nuosso Secretairo de Stado de la Cultura i l Circulo de Leitores tamien.
L mundo de ls anteletuales i las ounibersidades inda ye pior que l de la politica.
Tiu Almendra fala porque sabe. (esta frase tenie que benir eiqui, se nó l quementairo nun era miu) :))

Adelaide Monteiro disse...

Gustando ou nó de Saramago, isto ye de génio i bien aguçado i de grande crítico cumo el siempre soubo ser.

Que cérren las bragas bien cerradas a ber se nun bótan tanta trampa, porque na berdade eilhes stán-se cagando pa ls antresses de quien mais percisa!!!!

Ana disse...

Corregi Totulhas:

... catedral de CHARTRES... que bal la pena besitar por acaso mas de forma ningua pribatizar. Tenie rezon Saramago.

An França tamien, durante l mandato de Sarkosy, fui tomada la decison de fechar tribunales i de pribatizar todo l que fui possible pribatizar.... subretodo aqueilho que podie dar a ganhar muito a alguns! Mas ls eileitores acabórun por decedir eilhes tamien. Nun solo esse presidente nun tornou a ser eileito cumo todos sáben agora cumo deixou a haber pul menos mais de 100 deputados de l mesmo partido que l del na Assembléia Nacional... Algua cousa debie de mudar. Las pessonas fartórun-se de ber que quien enriquecie éran aqueilhes que menos precisában i debien de apertar l ciento siempre ls mesmos.

De l que ye que l Pertueses stan anton a la spera para se dar de cuonta an quien ye que dében de tener cunfiança ? Ou será que quieren inda mais probas de l que les bai acuntecer ou yá les stá a cuntecer ?

Speremos assi i todo que yá nun seia tarde demais!

Unknown disse...

Tanto fizo Sarkosy cumo bai a fazer este que agora ganhou!
Son todos pul miesmo sistema i ende stá l porblema!
Denheiro, mais denheiro cumo diç Mário Soares, outro tal!
L pobo trabalha i ls nuobos ricos (porsores, scritores, jornalistas, politicos, anteletuales) gánhan denheiro.
Quien ten ye que manda!
L pobo bibe na eiluson de ser rico, de tener denheiro i bai ne l paleio de ls nuobos ricos i bai le dando ls botos! Até ls griegos fazírun cumo ls franceses, dórun ls botos als de las buonas palabras.
Ana, andas de anganho an anganho.
Yá beremos adonde bai la França!
L pobo nun ten partido,nien anternete, trabalha para tener que comer.

Ana disse...

Nun adianta, Primo, star a falar-me a mi sola.

Bibo nun paíç de mais de 60 melhones de habitantes que yá cunheciu dues guerras mundiales. L mais deilhes sáben l que lhutar quier dezir, inda hoije. I you beio esso todos ls dies i quando me acuntece ampeçar a çcunfiar assi i todo bonda-me ler ciertos lhibros para tornar a tener cunfiança outra beç.

Buonas nuites i lede bós tamien cousas que bos déien outra beç cunfiança.
You inda nun cheguei a ler todo l que screbiu Saramago mas a mi bondou-me Deste mundo i de l Outro para haber quedado mui ampressionada. Nun bos squéçades que naciu nua familha tan modesta cumo la nuossa. I esso tamien cunta.

Unknown disse...

Ana,
Tamien nun bal la pena andar siempre cula França na boca. Se ls outros nun le bótan la mano bien tenie zaparcido. L "9 de Abril" amostra bien que ls perueses son bien melhores qu'eilhes. I mais, nien le maior eisército de l mundo ne tiempo de Napoleon cunseguiu fazer nada culs portoguesicos. Ls pertueses nunca perdírun la cunfiança i nun percísan de lhiçones, quando fázen scuolhas son mais spietos que tu pensas. Deixa an paç essa reboluçon que yá passou de moda.
Saramago ye Saramago, mas nun passa dun home que pul mundo passou, quedou na stória, tamien Hitler.
Tue bó Ana que sabe Dius l que passou para criar ls filhos, bale bien mais qu'eilhes.

Tiégui disse...

A mi aquestas cousas dan-me cunfiança :

http://www.furmientu.org/01Documentos/9999999994El%20llumbreiru%2028.pdf

Ana disse...

La França ye un de ls países de l mundo que acolhiu l mais grande número de Pertueses zde hai meio século i muitos sendineses, buossos cunterráneos i tamien familiares, cumo bien sabeis Primo, sien que naide inda hoje ls oubrigue, scuolhen de aqui quedar a bibir i trabalhar. Só por essa rezon debies de falar cun mais respeito quando amentais na França.

L 9 de Abril, dezis sien andicar l anho... Quereis falar de quei? De l 1° die de la batalha de la Lys ne l anho de 1918 que acabou por ser ua terrible derrota para las tropas pertuesas na Flandres? Mas por bies de quien? De ls Franceses ou pul cuntrairo tamien de ls Angleses ou até de ls próprios Pertueses? Era buono saber bien de l que stamos a falar.

Falais de Napoleon que deixou de ser hai muito ua refréncia para muitos Franceses. Todos sáben que fui un déspota tal i qual esse outro que tubimos an Pertual mais recentemiente.

Quien bos dixo que ls Pertueses precisában de liçones? Precísan cumo precísan todos ls outros i para esso ajuda ber las cousas cun houmildade mas tamien algua sabedorie i nó aprossimaçones.

Ls pobos nun fázen reboluçones para andar na moda ou para passar l tiempo mas l mais de las bezes porque se sénten desprezados, splorados i até martirizados.

You nun tube só ua abó que se chamaba Ana mas dues.

I para acabar yá que nós ls dous cheguemos a dezir un die a Tortulhas que nun habiemos apreciado i achábamos eicessibo que tubisse acumparado, aqui neste site, Merkel a Hitler i Sarkosy a Pétain, you inda quiero deixar de bos dezir que you tampouco aprecio que téngados puosto subre la mesma linha Saramago i Hitler. Hai cousas, Primo, que nun s’admíten ! You quando me referi a las dues guerras mundiales por que passou yá la França pensei antes de todo als melhones de pessonas que perdírun la bida an condiçones muitas bezes einimaginables. Bien pior, tengo la certeza que nun m’anganho, que todo l que bós cheguestes a ber nun paíç cumo Angola.
I se digo esto, ye porque you inda nunca li ou oubi até hoje testemunhos tan grabes i einimaginables cumo ls que ls subrebibientes (tan poucos!) de Auschwitz por eisemplo fúrun inda capazes de rebelar al mundo. Para las giraçones futuras. Para que naide nunca mais se squeça.

Unknown disse...

Ana,

Acabeste de dar ua lhiçon de stória de las más fracas que algua beç oubi ó melhor, li.
Essa ye la tu bison de la stória, la stória de quien scribe l que le cumbén. La stória de ls doutores.

Deixa alhá essa litomie de star siempre a falar de l que de mal fazírun uns i outros, de querer amarrar uns a la stória i a outros eilibá-los.
La França se acolhiu ls eimigrantes ye porque percisaba deilhes i ls patrones son eiguales an todos ls sitios, cumo an todo hai buono i malo.

Sei melhor que tu l que ye ser eimigrante, tu nunca dormiste cinco nua cama, cun dous culs pies para un lhado i trés para l'outro. La França tamien fui esso. Pertueses a bibir an barracas de carton i de trabas. Sien tenéren casa de banho, sien médico, sien las cundiçones básicas. Nun gobernaba Salazar alhá. Era outro tiempo, tamien an França.

Tamien nunca soubiste l que ye fazer calhos nas manos. Ser puls trabalhadores cul que se d'aprendiu ne ls meios anteletuales nun ye eigual al dun trabalhador.

Naide ye acontra ó a fabor de nada, quando nun sabes dar ua respuosta ó nun te cumbén alhá benes cun teories.

You referie-me a tu bó Ana Falcão, mas la outra inda las passou bien piores. Essas si que deberíen ser las tues heiroinas, mas nun stan na atória de ls tous amigos, nun fázen de ti ua scritora ó senhora amportante, mas dórun te bida i sien eilha nada eras.

Tamien inda nunca penseste que antes que julgar seia a quien seia, deberies porcurar saber porque fui que fazírun l que fazírun?
Que sabes tu de Angola? Quanto menos se falar ne l que passou melhor, sabies? Las feridas cúran-se nun se anda siempre a mexer neilhas.

Passais l tiempo a falar ne l que passou. Mirai pal feturo.
La bida ye para bibir, todos cun alegrie i nó a pedradas.

Ana disse...

Cun bós, Zé Almendra, l nible (de sensibilidade, de respeito, de cumpreenson i de degnidade) na maneira de pensar i de progredir na reflexon poderie rapidamente baixar se ls buossos anterlocutores (you neste momento) nun soubíssemos chegar a la cuncluson que cun bós ye mesmo scusado star a perder tiempo.
Ye pena anton ?

Nien sequiera !

Unknown disse...

Ana,

Bei-se quien baixa l nible!

Quien nun ten nun puode dar i quien nun puode nun se mete.

Quien nunca fui pobo, nun l puode defender bien!