La Fiesta de la Senhora de las Candeias

La Missa

Mais ua beç ls Zenizienses, sous decendientes i amigos a bibir an Lisboua i alredores stubírun ne l die 6 de Febreiro de 2011, armanados ne l sprito de pertença, de ounion, de partilha i amisade a comemorar la fiesta de la Senhora de las Candeias. Este die cuntina a ser pa ls Zenizienses l retornar a las ouriges i a lhembrar l die de fiesta na aldé que siempre acontecie ne l die dous de Febreiro. Nesta fiesta nun faltaba l grande lhume de cepos apanhados culs carros de bacas pul mordomo i pula mocidade que fazie l ancanto de ls garotos i calcie nuobos i bielhos. Hoije esse lhume an Zenízio cuntina a ser grande i ls cepos inda son apanhados pul mordomo i pula mocidade, mas culs tratores.
Astanho i cumo tamien yá ben sendo aquestumado alguas de las pessonas, ampeçórun a chegar a l’ Eigreija Paroquial de Bal Figueira, arrimado al meidie i, quando yá habie un bun juntouro, chegou Isabel Serras cul sou tiu pa l redadeiro ansaio de ls cânticos. Anquanto ls ansaios decorrien fúrun chegando las restrantes pessonas i al meidie i meia alhá stában arrimado a sessenta pessonas para assistir a la celebraçon de la missa pul Sr. Padre i amigo António Morais, natural de Bila Chana de la Freixenosa.
La missa an memória de todos ls que yá mos deixórun fui dezida an mirandés pul sr. Padre António, assi cumo las lheituras. Ls cânticos fúrun cantados an pertués i an mirandés, acompanhados a la biola por Isabel Serras i Carlos Vaqueiro. Na sue prática l sr. Padre António Morais, çtacou mais ua beç l’ amportança de la lhéngua mirandesa que la maiorie de nós daprandiu an pequeinhos i que cuntina a ser la grande lhigaçon desta quemunidade eiqui persente, que fai cun que las lheituras, l Eibangeilho i alguas cantigas séian an mirandés.
An seguida falou de la grande amportança dada als Santos i a Nuossa Senhora pula Eigreija, comemorando ls sous dies cun fiestas an todas las aldés, an çfabor de Jasus i, perguntaba-se porque serie que Jasus nun tenie tamien la sue fiesta an todas las tierras cumo ténen ls Santos

L Almuorço

La parte spritual cuntina a ser amportante pa la maiorie de ls Zenizienses i amigos, mas cumo las pessonas son un todo, nun quedarien cumpletas se nun tubíssen an die de fiesta un buono almuorço i l cumbíbio culs amigos.
Assi, apuis de la missa la fiesta cuntinou ne l restaurante na Quinta de l’ Adega na Sobreda. Chegadas al restaurante las pessonas fúrun antrando i ancuntrórun ua sala bien agradáble cun mesas bien ampinponadas. Apuis santórun-se i ampeçórun a saborear las antradas i a cumbersar. Estas cumbersas depriessa lhebórun muitos de ls persentes a lhembrar cuntas i stórias passadas quando eran pequeinhos ou yá moços.
L almuorço cuntinou culs ampregados a serbir un buono bacalhau a la tibuorna seguido de lhombo de cochino cun ananaç i todo isto acumpanhado cun un bun bino, sangrie, sumo i auga. Cumo an die de fiesta nun hai priessas l almuorço fui demorado i quando las pessonas se lhebantórun para ir a las subremesas, que stában nua mesa bien cumpuosta cun muita culidade de fruta i doces, yá passaba de las trés i meia de la tarde. Apuis fui serbido l café i arrimaba-se la hora de passar a la parte Cutural i a L’ Assemblé Giral.

La Dibulgaçon de Lhibros i L’ Assemblé Giral

Anquanto ls associados de l Nial de la Boubielha, cumprien l sou deber pagando l almuorço i ponendo las cuotas an die, fui-se fazendo la dibulgaçon de ls lhibros screbidos an mirandés puls associados Alcina Pires, Adelaide Monteiro i Faustino Antão. Muitos fúrun ls associados que passórun pula mesa para poder çfolhar ls lhibros i algues acabórun puls mercar.
L tiempo fui passando i la hora de l’ Assemblé Giral de l Nial de la Boubielha depriessa chegou. Assi, l persidende de La Mesa de L’ Assemblé Giral, Francisco Domingues, apuis de saludar L’ Assemblé, pediu un minuto de silenço an houmenaije de ls associados que yá mos deixórun.
Passado l minuto de silenço dou-se einício als trabalhos, ampeçando pul purmeiro punto de l’ orde de trabalhos, adonde apuis de algues sclarecimientos dados por Basílio João, de la Direçon fúrun aprobados por ounamidade l relatório i cuntas de l anho de 2010 bien cumo l parcer dado pul Cunseilho Fiscal. Antrou-se apuis ne l punto dous de l’ orde trabalhos cun la çcuçon de la Perpuosta de Atbidades, apersentado pula direçon, bien cumo l sou orçamiento pa l anho de 2011. Apuis de alguas anterbençones de associados i de algues sclarecimientos dados pula direçon la Perpuosta de Atibidades i l ourçamiento pa l anho de 2011 fúrun aprobados por ounamidade.
Passou-se al punto trés de l’ orde de trabalhos, adonde fúrun çcutidos algues assuntos d’ antresse pa l’Associaçon, i adonde algues associados fazírun anterbençones ne l sentido de se fazer ua reflexon subre las causas que teneran afastado muitos associados de ls ancuontros/cumbíbios ourganizados pul Nial de la Boubielha i tamien pula pouca participaçon de ls mais jobes ne ls mesmos ancuontros.
Este ye un assunto que nun ye nuobo i ten que lhebar cada un de nós i an special la Direçon de l Nial de la Boibielha a ancuntrar soluçones pa l porblema.

Stá de parabienes l’ direçon de l Nial de la Boubielha, assi cumo ls outros uorganos sociales por mais este die de fiesta i, tamien todos ls Zenizienses i amigos que stubírun persentes i, que dun ou doutro modo dórun l sou cuntributo para ajudar a fazer esta fiesta.

Un bien haia al Sr. Padre i amigo António Morais, por mais ua beç tener celebrado la missa i haber stado antre nós neste die de fiesta que tamien yá ye sou. À Isabel Serras, pula sue çponiblidade para ansair i cantar las cantigas, neste die de fiesta tan amportante pa ls Zenizienses.

Francisco Domingues