«A La custa de ls cidadanos»

Quando ampeçou la guerra de Tróia, todos ls reis griegos fúrun chamados a cumbater. Oubrigado a apartar-se de la tie del, Penélope, i de l nino Telémaco, Oulisses solo deseaba bolber debrebe para casa. Anfeliçmente, la guerra durou dieç anhos i l la buolta del tubo tantas talanqueiras, que durou outros dieç.

Quando se soubo que la guerra se habie acabado i que, antre ls subrebibientes, solo Oulisses nun bolbira inda pa sue casa, houbo quien acraditasse que el se morrira ne l camino de buolta. L palácio anchiu-se debrebe de pertendientes a la mano de Penélope que, fiél a Oulisses, fui siempre adiando la repuosta. Ansastifeitos cula situaçon, ls pertendientes acupórun l palácio adonde passórun a fazer fiestas to ls dies i dezírun que solo s'eirien ambora quando un deilhes fusse scolhido para se casar cun Penélope i gobernar Ítaca.

Al cuntrairo de l que sperában, Oulisses bolbiu, scundiu-se ne l meio eilhes, çfraçado de pedinte, i solo amostrou quien era quando staba armado cun un arco i frechas i tenie a la mano lhanças i scudos. Anque inda tubíssen spadas i fússen muitos mais, ls pertendientes tubírun miedo. Muorto Antíno, l mais argulhudo de todos, Ourímaco quijo que le dira l perdon: «Bamos a pagar-te, a la custa de ls cidadanos, todo l que se quemiu i buiu nesta casa» (Homero, A Odisseia, Edições Europa-América).

Estas palabras bóndan-mos para ber l carátele desta giente. Passórun anhos a quemer bienes que nun éran deilhes i quando chegou la hora de respundéren por esso, aperpónen-se a pagar todo "a la custa de ls cidadanos". Que le respundiu Oulisses a esto? Cumo yera de sperar, matou-los a todos, cun ajudas de Telémaco, Oumeu i Filétio.

Claro que Oulisses tenie outras rezones para matar ls pertendientes: quejírun-se casar cula mulhier del, quejirun-le roubar l poder, atentórun matar-le l filho nua amboscada, anchírun-lo dua até un ciento an sue casa (quando cuidában que era un pedinte), i se podíran tamien lo haberien matado... Mas, assi i todo, habiemos de pensar neste causo.

Ye que inda hai por ende muita giente a bibir a la grande i a pagar las díbedas a la custa de ls cidadanos. Beia-se l que se passou quando ls bancos fúrun a la falhença. Quien pagou ls perjuízos? Nós. Beia-se ls grandes negócios por ajuste direto antre l Stado i ls amigos de ls políticos, las reformas ouscenas de quien trabalhou meia dúzia d'anhos na política, l denheiro gasto an studos feitos pa la gabeta, l'ambestimiento çproporcionado an submarinos que nin sequiera stan an buonas cundiçones, l denheiro que recíben de l Stado todos ls heipócritas que ban a la telbison a dezir que tenemos "Stado a mais". Quien paga esto todo? Nós, claro. I, se l que pagamos nun chega, nun hai porblema. Passamos a pagar mais.

Sou contra la pena de muorte i nun acradito na bioléncia. Assi i todo, a las bezes pregunto-me subre cumo serie l mundo se, a cada beç qu'alguien diç "pagamos la díbeda a la custa de ls cidadanos", aparecisse un Oulisses cun sou arco i frechas i le disse l tratamiento adequado. Çcunfio que serie un mundo bien melhor.