A la çtáncia de l pensar

Parece ampossíble stando an cuorpo nun lhugar i an sprito star noutro bien loinje.
Assi fui:
L cachico de tarte acabadica de zanformar soubo-me a cereijas, burmelhicas anrebuoltas an moras.
Lhambi ls beiços quando ls ambuznei ne l bolho de checolate, negrito cumo gusto.Botei-l ls dientes todicos, que se amólen ls quilos a más…
De la caldeirada de peixe que quemi a la cena, chegou-me un oulor a bolhos de bacalhau fregidos i douradicos cumo azeite birge. Tenien bacalhau i todo!... Si, porque a las bezes béian-se bolhos de bacalhau que nunca l biran, de bacalhau solo ténen l nome.
Bebi ua pinga de bino Lhéngua Mirandesa cun l oulor a bacalhau!
Cun todos me ri i bi-me ne l speilho de uns uolhos grandes dua rapaza alentejana, de nome Graça. Stube cun todos i lembra-se-me bien de tener bido ls uolhos azules guapíssemos de l amo de la casa. Quando se ri ls sous uolhos tamien se rien.
Uolhos, jinelas de l´alma!
Stou a oubir las risas de ls porsores apuis que cuntei ua lhona. Mira, mas you stou, cumo siempre, a ri-me más que naide! Yá me duolen las queixadas de tanto me dar la risa!
Antonho tamien yá me dixo, tu sós mui marota!
Quien you? Qu´anganhadico stás! Solo scribo muita baboseira, Antonho, falando cun la boca de ls outros; quien scribe ye mui anfingido!...
La mie bezina de l Toural rogou-me cun más un cachico de sou doce i de tabafeia, mas you dixe-l que querie un cachico de pito assado de l nuosso amigo cuntestatário, cun ua pinga de la jobe sendinesa que ten buon bino. Gustan-me muito las sues arganelas. A la cierta! La mie nuora tamien ten assi uas arganelas.
Agora bou-me alhá pala rue que eiqui delantre de la pantalha stá muita calor.
Deixo-bos. Torno para adónde habie stado to la sumana.
Gustei deste cibico bien passado, quemido i buido.
Alhá bos abéngades manhana cun ls altemóbles de la cidade.
You torno a molhar las panturrielhas, olé!...