Die de ls ninos i ninas

Hoije ye l purmeiro die de l més de Júnio, tamien anstituido por quien ten de dreito, l die de ls ninos i ninas (de las crianças)

Sien lhebar muito an cuonta qual ye l die de l més ou de l anho, l que mais amporta ye que s’antituiu un die cumo fuorma de balorizar i chamar l’atencion de todos para este grupo social.

I cumo to l mundo sabe, cada un de nós ten ua buona cerronada de palabras i antençones que eiqui ou an qualquiera lhado puode screbir ou botar, mas ua cousa son las buonas i guapas antençones outra ye la berdadeira aplicaçon i uso. Todos nós yá fumos ninos i ninas, i la maiorie nunca se dou cuonta de haber un die aporpriado pa el, tamien inda assi ye, nun fáltan ninos i ninas por esse mundo afuora que nun sáben l que ye un die festibo, que nun se dá cuonta d’hoije ser çfrente de ls outros, todos nós sabemos que l die de ls ninos i ninas dében ser to ls dies de l anho, porque ye la cousa mais baliosa de l’houmanidade.

Mas hai que balorizar siempre estas comemoraçones, yá que nun seia para çpertar las mentes mais adrumecida, yá que nun seia para que nestes dies nun se fágan atropelos als dreitos mais eilementares. Para que ls mandones i poderosos nun se lhémbren só de ls deilhes, para que l mundo atroç i biolento que cuida que todo s’arregla pula fuorça i pula sploraçon de l trabalho, demude de modos i caminos. Para que naide se squeça que inda hai ua jornada lharga por fazer para que dua beç por todas deixe de haber ninos cun fame i sede, sien pai nien mai para le dar un cuolho, sien casa nien beste para s’acobrir.

Ye guapo saber que ne ls tiempos que córren cada beç hai mais giente cunsciente de que quien dá als ninos i ninas ua buona eiducaçon, formaçon i ls cria saludables, ne l feturo aposta, l porblema ye se ne ls tiempos que córren nun ye capaç de le dar todo esso i l demais que percísan.

Quando ls tiempos nun son buonos las cousas tamien nun quédan fáceles pa ls mais pequeinhos, you até dirie que son ls purmeiros i ls que mais súfren, porque stan çportejidos, porque muitas bezes un téne cundiçones de se queixar.

Dende you dezir que buono ye haber estes dies de nomeada para dar boç queilhes que tanto merécen, ls ninos i las ninas.