José Saramago

La muorte spertou i agarrou a José Saramago, el que la habie puosto a drumir por un die, cuncluindo «L die apuis nun se morriu naide», mas hoije nun fui esse die apuis. Porquei me dá para screbir subre essa muorte se tanta hai todos ls dies? Tengo al miu lhado la pilha de ls sous lhibros i bou-los çfolhando, alguns yá castanho de polareda, uns lidos outros mei lidos i outros inda por ler, i talbeç essa pilha de lhibros seia la repuosta a aqueilha pregunta, yá que por eilhes Saramago se tornou persente. Por el i cun el, la lhéngua pertuesa fui até adonde nunca habie ido i falou-se de Pertual adonde nunca se habie falado, quier dezir, dua cultura, dun modo de star ne l mundo. Nunca fui andefrente al que se passaba ne l mundo, la boç alhargada i acrecentada pul prémio nobel que lhebaba a las cuostas. Un die passou por tierras de Miranda, comiu la puosta na Grabiela i deixou registrada la sue passaige anque sien se dar de cuonta de l'amportança de la lhéngua mirandesa que, nesses tiempos d'ampeço de ls anhos 80 de l seclo atrasado, inda mui poucos le dában balor i ralos sabien que era ua lhéngua anteira. L que screbiu queda cumo un menumiento de la lhéngua i de la cultura pertuesas, diga-se l que se dezir, guste-se ou nun se guste. La magie de ls grandes scritores ye que amóstran até adonde ua lhéngua ye capaç de ir, amostrando a todos ls outros la sue belheza, la sue música, la sue fuorça, l sou balor de houmanidade. Sien eilhes, las lhénguas quédan mais murchas, mais squecidas, mais scundidas, mais çpreziadas, nó por culpa deilhas que todo l balor ténen andrento, mas porque naide hai que las amostre al mundo an todo l sou splendor. Fui esta licion que hoije me bieno a la cabeça i por esso esta muorte merece ser falada por bias de todas las bidas que criou i ha de cuntinar a criar. Hai quien diga que ampeçou tarde, mas l amportante ye que chegou muito a tiempo.