Son las ganas acobilhadas

I sien dar por eilha nien muito sfuorço todo buolbe a ser cumo era dantes. Mesmo que seia ua daqueilhas manhanas an que apuis de lhabar bien la cara la sonheira se bote a ampatar, un dá-se de cuonta que las cousas yá stan a carreiro.
Ne la redadeira sumana habie menos pessonas nas grandes cidades, las rues quedórun zertas. Ye quaije siempre assi, quando s’arríman temporadas festibas cula caratelística de la Páscoa, dies que siempre marcórun i cuntínan a marcar ua tradiçon de l pobo. Son las ganas acobilhadas de besitar ls abós, pais, armanos i parientes, ls amigos, ls bezinos d’anfáncia, son las suidades de l Deimingo de Páscoa dantes, carregado dun oulor perfumado pulas guapas froles de to las quelores i tamanhos, la folhaige berde de las arbles, nun campo birge i puro. Ganas de star na tierra adonde nacírun, las suidades de bolber al puial de la puorta, ancuntrar nas rues ó squina algue de l que fui la sue ourige.
Será tamien aporbeitar l’ouportunidade de fugir daqueilho que la bida ampon ne l die a die para ganhar l pan i l sustento na grande cidade, de squecer por un rato to las canseiras i tropeçones nas idas pa l trabalho. Poder anchir ls bofes d’aire lhimpo que l’aldé inda ten, ír-se a percura dun cachico de paç i assossego pa l’alma i l sprito, que tanto percisa por bias de ls ampurriones i arrimos que se ténen ne ls trasportes ou nas rues acoquelhas de giente.

Será tamien fazer las pazes cul passado, un modo de dezir a la nuossa tierra, a la nuossa squinica que mos perdone por que mos scapemos, dezir-le que siempre bolberemos, dezir-le que stéiamos adonde stubirmos, stá andrento de nós. Será cumo fai l nino, siempre que l zanimo i la tristeza aperta percura l cuolho de sue mai.
Quando l nun star porqui ye perséncia an outros sítios, i las rezones fúrun saludables cumo esta para muitos, s’algue me queda n’alma ye la tristeza de nun l poder fazer siempre, sobra-me quedar armanado culs demais an que la cidade ye la sue morada l tiempo todo.