14/04/09

Palhestras an Mirandés





L Porsor Amadeu Ferreira stará de nuobo ne l die 18 de Abril, a las 15.30 horas, na Scuola Francisco Arruda an Lisboua, para dar la quarta palhestra de 2009.
Cuntinará a falar de la Lhéngua Mirandesa subre l tiempo que bai zde 1880 a 1940, an special subre José Leite Vasconcelos i las sues fuontes de anformaçon. Mais ua beç ls mirandeses a bibir an Lisbou i arredores i outras pessonas antressadas, ténen ouportunidade de oubir i falar l mirandés.
Estes son lhugares i momientes que ls mirandeses nun puoden perder. Las trés purmeiras palhestras fúrun mui antressantes, mas cumo todos sabemos l Porsor Amadeu ten siempre l don i la capacidade de mos agarrar. Assi, alhá staremos todos ne l die 18 a las 15.30 horas.
Para quien nun sabe la Scuola Francisco Arruda, queda na Calçada da Tapada, nº 152 an Lisboua (Alcántara). Ye mesmo agarrada a La Tapada de Agronomie i al lhado de l Pabilhon de l’ Ajuda.

Francisco Domingues

4 comentários:

leonardo antao disse...

Tenendo an cunsideraçon la sugeston de l amigo Tiegui, relhembro a todos ls anteressados an coincer la lhéngua mirandesa que:
• Se sabisses la grandeza de la ambestigaçon i l extraordinário balor cultural i lhinguístico destas Palhestras, tengo la certeza que benides todos a correr oubir Amadeu.
• Se gostais de la lhéngua Mirandesa, nunca mais deixarídes de benir a estas palhestras.

Cada beç somos mais a cuomprobar que scuitar Amadeu Ferreira ye scuitar la boç i la sabedorie mirandesa, ye scuitar la mais prefunda stória de l mirandés.

Se nun acreditais nestas palabras, léde ls testos de las outras palhestras anteriores feitos por Francisco Domingues i dezi-me se nun son riquíssimos cachicos de stória de l mirandés.

Nun çperdiceis esta boç de la sabedorie mirandesa!
Leonardo

Tiégui disse...

Buonas nuites Lhionardo,

Que sugeston fiç ? Ya nun me lembro ! Digo-las tantas i alguas bezes malas que nun me recordo de las buonas :-O

Tengo tantas cousas pra fazer que nun tengo tiempo de benir. Que se no nun m'amportaba d'apanhar l'abion.

Bon queda eiqui screbido que bengo a la de l mes de Junio. La ultima, acho you. Assi que tamien fui a la purmeira, bou a la ultima de l'anho.

Agora dezie-me bos quando ye... que nun sei.

Bien haiadesde,
Tiégui.

franciscobelharino disse...

Buonos dies Tiégui,

La derradeira ye ne l die binte de l més de San Juan i será un grande prazer tener-te de nuobo antre nós.
Nun sei se sabes que apuis dessa palhestra hai la cena de ancerramiento i quedas yá cumbidado para star neilha. Solo tenes que dezir se benes ou nó.

Un abraço,

Francisco Domingues

Tiégui disse...

Sta bien, ya bos lo direi pa la sumana que ben. Qu'agora l miu xefe sta de bacanças i nun sei se me deixa marchar nesse fin de sumana (ya que tenerei que poner la sesta, ya la segunda como de bacanças).

Andei a ber ls precios i por anquanto nun ultrapassan ls 140 ouros pra Porto-Paris-Porto, 170 para Lisboa-Paris-Lisboa. Al que nun ye assi mui mui caro. L'outro die marquei ua biage anté Bordeos por 160 ouros i so me quedei alha 2 dies, isso si fui caro hahaah (mas buolbie cun cantabouço de folar qu'isso nun ten precio :p )

Abraço