24/04/09

Culo a çcubierto




Quando m’aperpus a screbir este testo, nun fui a la purmeira nien a la segunda nien you sei al cierto quantas bezes yá habie tentado. I nun fui solo bencir l acanhamiento que tomou cuonta de mi, fui tamien por adonde ampeçar. Apuis de bárias tentatibas, reçumou algue na mie cuncéncia que me dixo, se cuntinar a fazer l que siempre fiç, que fui screrbir i falar de todo i de todos cun respeito i medida naide ten que lhebar a mal. Ye este l causo. L que agora bou a dezir ye subre ls outros, mas ten solamente a ber culas mies deficuldades an dantender ua modernice, moda que la jubentude an special ls rapazes agarrou i deilha fai uso: abáixan las calças i amóstran las ciroulas i quando estas tamien nun tápan todo até l culo se bei.
Quien me conhece sabe bien que talbeç esto me benga de lhidar to ls dies cun jobes, ye neilhes que you tengo la maior de las spráncias que l mundo de manhana seia melhor, mais armano, mais lhimpo i mais rico cultural i tecnicamente, siempre l dixe i nun fago fabor nanhun an tornar a dezi-lo. Mas cunfesso que hai modas que lhiebo tiempo i tiempo a dantender, até porque alguas deilhas (cumo esta) quando you tenie l’eidade deilhes (era moço) a naide le passaba pula cabeça abaixar las calças a nun ser para fazer aqueilho que nun se fazie cun eilhas puostas. Iba a ser bonito amostrar l culo... era la maior de las bergonhas!
Mas cumo la jubentude ten siempre anspiraçon para todo i anda un cachico çcaçuada de la bida i l çcrédito ye grande, la spráncia i certeza dun feturo melhor nun stá lhougo a la salida de la scuola nien de l’ounibersidade. Talbeç, digo you, este géstio i moda le querga dezir a la sociadade que agora inda s’amóstran las ciroulas mas a cuntinar assi mais die menos die amóstran l culo çcubierto.
Puis nun fui esso que fazírun ls ounibersitários hai uns anhos datrás nas scaleiras de l Parlamiento (San Bento) para rebelar l sou çcuntentamiento i rebuolta, nessa anstituiçon adonde ls repunsables eileitos de l Paiç para tocar ls nuossos çtinos palantre i para melhor, assientan las nalgas an scanhos forrados a piel de bezerro i tapadas cun buonas bestimientas feitas de panho de purmeira?!
Bou a ancerrar este testo dezindo que aceito i respeito to ls modos de cuntestaçon çque séian para demudar l que stá mal i téngan an cuonta l respeito puls outros, fui l que percurei eiqui fazer
Anquanto neste mundo stubir quiero i tengo gusto de dantender todo al miu redror se bai passando.


6 comentários:

Abelhon disse...

La geraçón Y, cume eiqui se amuostra: http://urzeira.blogspot.com/2009/04/geracao-y.html

Abraços

ACangueiro disse...

Culo, rego ou l'augueira!
Nunca regueiran ls sucos, mudaran l'augueira i tiraran l'auga de l poço cula cigonha.
Deiqui a uns anhos ban tener muitas dolores ne ls renhones por outras rezones que nun las nuossas.

La berdade yé que tenemos de tener fé ne ls jobes, puis nós quando teniamos la miesma eidade tamien faziamos tropelias i tantas bezes se oubia: l que será desta jubentude... i nós acá stamos a dar a beç als outros.
"Mudan-se ls tiempos, mudan-se las buontades...

Gostei Faustino

Ana disse...

La aparéncia preacupa muito a alguns (i nun son siempre ls mesmos !) mas la aparéncia ye solo aparéncia …
L mais amportante nun ye esso.
Ye la deficuldade que ténen hoije ls jobes para arranjar trabalho.
Esse i mais outros problemas bien mais grabes.
Mas talbeç haba quien tenga antresse a que nun seiamos capazes de ber adonde stan ls berdadeiros problemas.

Scalhabrés disse...

Hai moços i moços. Hai que fazer cuidado...que nien todos ándan cul culo al aire.

La maiorie de ls nuossos lados (praino) nun sigue essas boubadas. Por eisemplo nun sei de naide de Sendin que tenga las oureilhas furadas ó un "piercing" .

Mas hai moços agora que merecian uas balentes tundias. You cumo moço sei ber esso, mas ls pais ambeç de le bater por tiráren negatibas dan-le ua mota ó un carro.

franciscobelharino disse...

Buonas nuites Faustino,

Guapo testo este, mas la moda de que falas ye solo dua pequeinha parte de ls jobes. La maiorie nun anda cul culo a l' amostra. Tamien you acredito nesta jubentude i hai muitos jobes cun muito balor i cun muita cultura. Tengo sprança que bengan a ser eilhes a fazer las grandes mudanças que inda hai que fazer na nuossa sociedade.

Un abraço,

Francisco Domingues

Fir disse...

Buonos dies.
Eu tenho sempre dificuldade em acompanhar discussões sobre a juventude, porque eu não sei o que são jovens. Pessoas de 15, 20, 30, 35 anos? E se agora, toda a gente quer ser jovem toda a vida, como delimitar estas coisas? E se para trabalhar em certos sítios, uma pessoa com 27 anos já é velha, afinal o que é um jovem?
Um cartão Jovem é válido até aos 26 anos, mas há programas do Instituto Português da Juventude que aceitam jovens até aos 35. Afinal, o que é um jovem? E um jovem de 20 anos é o mesmo que um jovem de 15 ou um de 25 ou um de 30? A mim, parece-me que há um perigo de generalizar.
Um abraço.