La quaresma

Arrima-se la Sumana Santa i l Deimingo de Páscoa, ua temporada bien marcante para todos, até porque ben siempre achegada a outro die que ye l ampeço de la Purmabera.
Siempre miu pai mos falaba que mie bó Lucrécia (abó de las saias, casada cun abó Luciano), bibírun i morrírun-se n’aldé de Malhadas, que nun sabie quando ampeçaba la Purmabera, que até ten die cierto ne l calendairo, mas si sabie quando era l Deimingo de Páscua que nun l ten, cumequiera por bias de la prática de l cura ou por bias de la lhuna.
Porqui se puode ber que siempre la Páscua tubo sentido na bida de las nuossas gientes, ansinadas na fé i créncia de bibir segundo la relegion católica, chegou até nós quaije sien ser aparchacada. Nesse tiempo, si porque hoije to ls dies son dies de fiesta, só armanado al die de Natal, n’ánsia de chegar i festejar, porque ls roscos, folar i demais lhambisquices de quemer éran rezon de sobra para ninos i ninas séren ls reis i la proua, bestidos cula melhor camisica de seda ó xambrica guardada ne l baú ou anquemienda ouferecida dun padrino eimigrado alhá bien loinge.
Sumana Santa, Deimingo de Páscua, tiempo cheno de simbolismo, ben quando todo na natureza se çpon a dar l sou melhor i l mais guapo, tamien assi debie ser cun l coraçon de ls houmanos. Agarrar nestas tradiçones, balores culturales i relegiosos, multeplicá-los i poné-los al serbício de ls que mais percísan i nun aforrar an géstios de paç.
Para todos ls que eiqui scríben i bénen a ler, ls mius deseios de ua buona Sumana Santa i un Deimingo de Páscua na cumpanha de ls sous familiares parientes i amigos.