La quarta palhestra de mirandés de 2009 ( I )

Ne l die 18 de Abril, na Scuola Francisco Arruda an Lisboua, tubo lhugar la quarta palhestra de mirandés an 2009. Nun stubírun nesta palhestra alguas pessonas por afazeres de la sue bida ou por inda stáren na aldé. Mas inda assi stubírun 22 pessonas i destas hai que çtacar Adelaide Monteiro, nacida na Speciosa, que yá era de la quadrilha de froles mirandesas, mas nunca habie stado nestas palhestras para oubir l Porsor Amadeu Ferreira. Antes de ampeçar la sue prática l porsor dou anformaçon dun filme chamado "Do Japão à Miranda’’ que fala de la Tierra de mirandea, de la sue cultura i de la sue lhéngua, serbindo-se de las andanças de l Japonés Satochi. i, até un cierto punto, acumparar las dues culturas, amostrando la ounibersalidade de la cultura mirandesa. La produçon desse filme ye de l mirandés Joaquim Vieira, argumento fui screbido por Amadeu Ferreira, cun realizaçon i guion de Miguel de Cia que yá habie rializado A Sombra dos Abutres. La produçon tubo apoio de la RTP2 an verson pertuesa, mas l filme bai ser eiditado tamien an mirandés.
Apuis desta anformaçon l Porsor Amadeu fizo un pequeinho resume de las trés palhestras yá feitas i de las fuontes de anformaçon de JLV que fúrun, an special:
- Branco de Castro de Dues Eigreijas, L Abade Sardina de Samartino, las pessonas cun quien JLV falou nas sues dues biaijes feitas an 1883 i 1884, Bernardo Fernandes Monteiro de la Pruoba i Manuel Ferreira Deusdado de Riu Friu. Lhembrou que nestas palhestras cuntina a falar ne ls sessenta anhos eissenciales pa la stória de l mirandés que ban zde 1880 a 1940. Nesta quarta palhestra falou de l tiempo que bai zde Maio a Dezembre de 1898 i de Francisco Garrido Brandão (FGB), un mirandés de Cércio. Era filho de mai solteira i ls abós maternos éran de Dues Eigreijas. L pai trabalhaba n’ Alfándiga de Miranda i era de Lisboua. Francisco Garrido Brandão era agricultor an Cércio i nun tenie grande anstruçon, mas era un home cun buona scrita i cun ua grande cultura popular. FGB tenie mais un armano chamado Manuel Brandão.
An Maio de 1898, nas comemoraçones de ls 400 anhos de la chegada a l’ Índia, ouganizou- se an Lisboua un grande corteijo i ls pauliteiros benírun pula purmeira beç a Lisboua para participar nel. Ls pauliteiros éran ls de Custantin, mas tenien alguns moços ne l grupo de Cércio, sendo un deilhes Francisco Garrido Brandão que era l tamborileiro de l grupo. A pedido de la Sociedade de Geografie, que ourganizou l corteijo, quien tratou de la benida destes pauliteiros a Lisboua fui l mirandés Albino Morais Ferreira, que era na altura l persidente de la Fundação João de Deus. João de Deus habie screbido la Cartilha Maternal para ansinar a ler i antes de se morrer deixou ancarregue de la anstituiçon que habie fundado este mirandés de quien bamos a falar mais na parte dous deste trabalho. Assi, cun l apoio de la Cámara de Miranda, atrabeç de un tal Augusto Lima, alhá benírun por ende abaixo ls pauliteiros sendo recebidos an Lisboua pul tal Albino Moraes Ferreira, que siempre ls acumpanhou durante la sue stadie i atuaçones.
La benida de ls pauliteiros a Lisboua chama l’atençon pa la dança, l que anté ende solo habie çpertado un antresse lhemitado. Nien José Leite Vasconcelos le habie dado qualquiera amportança. Cun esta benida de ls pauliteiros, quedórun dadas alguas notícias ne ls jornales i alguas cartas an mirandés. Mas l que de mais amportante ende se passa pa la stória de l mirandés ten a ber cul aparcimiento de Francisco Garrido Brandão, ua de las mais amportantes fuontes de la cultura i lhiteratura mirandesas de l seclo XIX.
Ls pauliteiros fázen bárias atuaçones pulas rugas i praças de Lisbou i nua deilhas an frente de la pastelarie Suíça, apareciu JLV para recolher anformaçones, junto de alguns pauliteiros i an special de Francisco Garrido Brandão, l tamborileiro de l grupo. Quando JLV yá staba a la fala cun este i a tomar notas nun cadernico chega Albino Moraes Ferreira i pon-se contra la transcriçon de l quelóquio Sturiano i Marcolfa i diç a Francisco Garrido Brandão que bai a ser el que bai a eiditar esse quelóquio.
José Leite Vasconcelos queda todo anraibado i cun miedo de perder la delantreira pa l tal Albino, scribe ua carta al Cónigo Moraes Calado de Miranda, cun quien trocaba correspundéncia. L Cónigo Moraes Calado era de Bempuosta i fui randido pul padre César de quien la maiorie de nós yá ten lhembrança. L Cónigo fala cun Francisco Garrido Brandão para este nun dar anformaçones a Albino Morais Ferreira i an carta de 4 de Júnio dá cuonta a JLV de ls passos dados i manda trabalhos yá antregues por FGB. An 14 de Júnio manda nuoba carta a anformar que o Albino andaba a tentar copiar ls trabalhos de l Francisco Garrido. An 28 de Júnio manda outra carta dezindo que l Francisco Garrido quedou de screbir ls lhaços an mirandés i castelhano.
Cumo se staba an tiempo de segada, Francisco Garrido solo a la nuite podie trabalhar, mas cumo tenie pormetido nun çcansa anté nun acabar l trabalho. An carta de l die 30 de Júnio l Cónigo manda ls lhaços i diç a JLV que bieno mesmo l Francisco Garrido a mie casa a antregá-los, mas you staba pa las Quintas a dezir missa i nun pude falar cun el. Cuntina dezindo que l copista de Cércio ten andado mui acupado na segada i que afinal nun ye l gaiteiro de l grupo, mas si l tamborileiro i ten un armano que toca l bombo. Cuntina referindo-se a Francisco Garrido cumo sendo un home sien anstruçon i que nien sabe l que scribe. Ora isto rebela ua falta de respeito mui grande por quien staba a trabalhar i a dar anformaçones que serien apuis publicadas por JLV. José Leite Vasconcelos fala pula purmeira beç de ls pauliteiros apuis de la benida destes a Lisboua an Maio de 1898 i dedica un capítulo no volume I de Filologie Mirandesa i ende pon ls lhaços que Francisco Garrido Brandão le habie ambiado, mas sien refere l sou nome mas dezindo que fui anformante un camponés de Cércio.
Francisco Garrido Brandão ye ua fuonte mui amportante para JLV, mas este nunca l recoinciu cumo tal. Estes lhaços publicados ne ls Estudos de Filologia Mirandesa stan an Castelhano, ua beç que l Cónigo Moraes Calado, habie dito a JLV que ls lhaços éran dezidos an Castelhano. An aneixo stan screbidos an mirandés pula mano de Francisco Garrido Brandão. Este ye un de ls purmeiros trabalhos screbidos an mirandés que nun baria muito de l que hoije se scribe de acordo cun las reglas de la Cumbençon, i que até agora nunca fui publicado.
José Leite Vasconcelos dedica outro capítalos de l volume II de Estdudos de Filologia Mirandesa i publica l quelóquio Sturiano i Marcolfa, de Francisco Garrido Brandão, desta beç yá fazendo referéncia al nome de l sou autor.

(cuntina)

Francisco Domingues