L sapo moraba
Acerca de l’augueira
Nua tierra plantada
De cereijeira
Trator cun charruas
Bieno -la a arar
I botou l sapico
A arrebolar
A ua bida tranquila
Staba aquestumado
Cun sucos pouco fondos
Que ls fazie l arado
Estas máquinas bárbaras
Deixórun-l o zgraçado
Aquilho nun ye suco
Mais asparece un balado
Quier salir deilhi
Daqueilhes galatones
Mas l sapico cuitado
Sólo dá ancuntrones
Chube pa l cerro
Dá outra caída
Torna-se a lhebantar
I diç mal de sue bida
Çcorçonado i cansado
Parou aqueilha lhuita
I dixo mi alto
Mas que naide me scuita!
Scuitou-lo ua ciguonha
Que andaba na arada
A quemer lhumbrizes
I todo l que achaba
L sapico biu-la
I botou-se a correr
Por un suco abaixo
Naide l pudo detener
I an sue augueirica
Se fui a meter
Ambergonhado
Daprendiu la liçon
Quanto mais se quier chubir
Maior ye l trambulhon!
Subscrever:
Enviar feedback (Atom)
6 comentários:
Buonas nuites Adelaide,
Que guapos bersos estes subre l sapico de l' arada. Nesta Páscoa stube nessas tierras acaras a Angueira de que falas, mas nun habie nien aradas nien sapicos para ber.
Un abraço,
Francisco Domingues
Mas olha, Francisco, esta stória naciu quando passei por essa arada, adonde stube muita beç a ser bueira de l lhado de baixo i queda antre la Speciosa i Angueira. Habie mesmo alhá la augueirica.
Beiso para ti,
Delaide
Amiga Adelaide,
Claro que essa arada i l' augueirica de que falas stában alhá. You andube mais pa ls lhados de Trabacinos i ende solo habie barcegos i scobas.
Un abraço,
Francisco
Parende hai matagáles mi bárbaros. You a las beçes tamien bou parende a caminadas cun la mie perra, sien çtino i yá nien caminos se beian,an ciertos sítios.
Stubo un tiempo mui berdugo desta beç, uas eiraçadas tan fuortes!...
Beisicos
Delaide
Amiga Adelaide,
Ye por isso que you dezie que nun habie aradas nien l sapico. L tiempo stubo cumo dizes belhaco, mas al soalheiro nun se staba mal.
Amiga Adelaide será que te bamos a ber na quarta palhestra de mirandés?
Serie ua surpresa mui agradáble para Amadeu i para todos nós. Alhá speramos por ti.
Un abraço,
Francisco
Bou a ber se arranjo cumpanha. You si quiero i la surpresa i alegrie serán mi grandes tamien pra mi, por ber tantos amigos que se cálha anté inda me lambrará dalguns. You andube por acá anté ls 19 anhos i apuis de ls 25 ( a morar fuora ), mas quien sabe... Seia cumo fur somos todos amigos birtuales i an Agosto hemos de mos ancuntrar.
Quanto a la palhestra de Amadeu, quiero ber se bou.
Beisicos, Francisco.
Adelaide
Enviar um comentário