Ai! Miu Dius miu Dius

Ai! Miu Dius Miu Dius
Nun sei cumo bai a ser
Tengo you la baca manca
I la sementeira por fazer

La bida ye cumplicada
Bien cruel de passar
Anda la baca a mancar
Nun puodo fazer la arada
Ye ua grande maçada
Anté me dan calafrius
Yá you le dixe als mius
Cumo fazermos la sementeira
Ye assi desta maneira
Ai! Miu Dius miu Dius

Tenie ua brocha spetada
Mas you yá la arrinquei
Cun criolina la reguei
Mas nun puode fazer nada
Cumo you fago la arada
Stá toda, toda por fazer
Esso querie you saber
Cumo bai a ser anton
Cun esta cunsemiçon
Nun sei cumo bai a ser

L quei ye que fago agora
Cula baca desta maneira
Stá ende la sementeira
I la baca nun melhora
Pido a Dius nesta hora
Que me sane la manca
Cumo aguantar esta tranca
Un uosso duro de rober
Nun sei quei hei de fazer
Tengo you la baca manca

Las cousas que pássan na bida
Sin un las eimaginar
Cumo las bou aguantar
Miu Dius la bida ye fodida
La cousa yá stá perdida
Sin un s'aperceber
Nun me puodo you squecer
Sigo you cun mie tamanca
Tengo you la baca manca
I la sementeira por fazer

José António Esteves