Un die destes arrecebi un mail, ua dessas cartas que bénen pula anternete, que trazie colgada ua lhona, an anglés, que you achei mui anteressante. A ber se sou capaç de bos la cuntar an Mirandés:
Diç que ua beç, nua fábrica dessas mi fuortes, se abariou l cumputador que daba cuonta de todo i la fábrica tubo que parar. Cumo bamos a fazer, cumo nun bamos, quien será capaç de lo amanhar, chamórun un angenheiro mi afamado, a ber se daba cuonta de l recado.
L home chegou, mirou todo, coçou la cabeça, cabilou un cachico, dou-le ua risica, carregou nun betonico, i, trapa!, l cumputador quedou citre cumo se houbira salido anton de l forno.
Que home tan baliente!, outra cumo esta!, bundou-le carregar nun betonico, quanto bos habemos de pagar?!
Son mil ouros, arrespundiu l angenheiro, cun ua risica houmildada.
Ai loubado seia Dius!, isto ye ua lhadroneira, más balie poné-bos na strada cun ua pistola…mirai mil ouros solo por carregar nun betonico!!, solo bos pagamos se mos passardes un papel cun l serbiço que fazistes i l précio, todo bien splicado!
Mui bien, arrespundiu l angenheiro.
Soutordie, aparciu la fatura na fábrica i dezie assi:
Carregar ne l beton – 50 céntimos
Saber an que beton se habie de carregar – 999 ouros i 50 céntimos
1 comentário:
Stá buona.
Essa ye aparecida a aqueilha de l galho, que ye assi:
Un tiu tenie ua andústria de pitos i fui-se a tener cun un pintor afamado a mandar pintar un galho para poner ne ls scritórios de l'ampresa. Passado un anho, l tiu fui-se outra beç a tener cul pintor a saber se yá habie pintado l galho. L pinto mandou-lo sperar un cachico, agarrou ua tela i, an 5 minutos, pintou un galho pimpon eilhi delantre de l tiu. I diç-le pa l tiu que son 200 mil euros. Delantre de l'admirança deste, yá que habie sido tan fácele pintar l galho i tan debrebe, l pintor agarra-lo i lhieba-lo a ua sala grande que tenie al lhado. L tiu al abrir la puorta bei que staba toda chena de galhos pintados i ende antendiu porque rezon l pintor solo habie tardado 5 minutos a pintar l galho.
Enviar um comentário