L die que ampuntórun Nuossa Senhora de la porciçon

(testo publicado ne l Jornal Nordeste an 07-V-2013 - acreçantado)

Hai fiestas i tradiçones que se muorren de “muorte morrida”, rezones naturales, falta de giente, falta de mocidade, mudança de ls questumes, muita çfrente “malina”… i hai outras fiestas i tradiçones que se muorren de “muorte matada”, acában a la fuorça, acontra la buntade de la “família” de l “muorto” i solo para sastifazer las zízaras, las birras i la beidade pessonal de ls “assassinos”. Este testo fala de ua dessas fiestas, que está hoije a ser bítima de “muorte matada” i fui screbido, a caliente, cul solo fin de ber se haberá maneira de inda salbar l “marimundo”. Ambora este seia un testo d’oupenion i, por isso, las eideia çfendidas solo “bincúlen” l outor, sabemos que son pertelhadas por quaije to la “família” de l dito “marimundo”, la giente de San Pedro de la Silba.

Cumo testo de oupenion que ye, ampeçamos cun ua que para nós ye clara cumo l’auga: l Santuário de la Senhora de l Resairo, cerca de las Minas de Santo Adrian, ne l termo de San Pedro de la Silba, ye l más guapo Santuário de l mundo, mormente agora na primabera, cul termo spintalgado de froles, capaç de fazer ambeija als más guapos quadros de ls más buono pintor ampressionista.

Ye neste cenairo de paraíso, ne l purmeiro demingo de maio, que se fai to ls anhos la fiesta de la Senhora de l Resairo, a la que alguns le cháman San Marcos. Ye ua fiesta cun cientos de anhos (hai çtemunhos bibos an san Pedro cun más de cien anhos) i ancarna la deboçon más fonda de la giente de San Pedro i talbeç de muita de ls lhugares bezinos – Bilasseco, Caçareilhos, Granja i Fuonte Lhadron. Cumo l capielha queda mi cerca de las marras, an tiempos, houbo guerras ciegas i tremendas antre ls pobos de San Pedro i de Caçareilhos por la puosse de la capielha i l’ourganizaçon de la fiesta: chegou a haber muortes, feridos, zangas que parecien eiternas. You sei de l que falo, que miu abó era de San Pedro i mie bó de Caçareilhos, yá oubi muita cuonta de las que l home passou durante l namoro.

Para l bien i para l mal, la fiesta fui zde siempre ourganizada pul pobo de San Pedro. Ampeçaba an San Pedro, cula salida de l andor de Nuossa Senhora, arrodiada de ls garotos de la Cruzada, i apuis, a salida de l pobo, cuntinaba lhebada pula mocidade als ombros pul camino anté la Senhora de l Resairo, pori uns quatro quilontros i meio. A la chegada al Santuário, fazie-se/fai-se la porciçon de l Ancontro, antre l’eimaige de la Senhora de San Pedro i la Senhora de l Resairo, cumprindo un ritual, centenairo, an que las eimaiges se “salúdan” azinolhando trés bezes Ua delantre de l’Outra. Apuis la missa, outra porciçon, a fin de missa, quemer la merenda antre família i amigos, rezar l terço i, para acabar, la porciçon de la Çpedida, cul ritual eigual al de l encontro. Apuis an San Pedro, a la tardechica, outra porciçon para lhebar a Nuossa Senhora pa la eigreija i, a la salida de l'eigreija, sperar l cura, santá-lo anriba d'ua cadeira i lhebá-lo an ombros anté la sue residáncia, adonde oufrecie bino i antremoços a todo mundo. Fiesta guapa i un manadeiro pa ls eitnólogos!

Durante to l anho litúrgico, estes cachicos de las porciçones de l Ancontro i de la Çpedida, son talbeç aqueilhes más “místicos” i más “mágicos”, adonde ye más besible la Fé i la deboçon que l pobo ten por Nuossa Senhora de l Resairo. Isto puode parecer algo redículo i anfantil, mas quien ye de San Pedro o quien yá biu l Ancontro, sabe bien de l que you stou a falar: uolhos rasos d’auga, piel de pita, silenço cumpleto, cousas que represéntan bien la crença i la Fé, simples i fonda, de la nuossa giente.

Claro que la fiesta fui bariando algo durante l tiempo: deixou de haber garotos para la Cruzada, l andor de San Pedro ampeçou a ser lhebado nun trator, yá nun hai cura cun residéncia an San Pedro i, cun nó menos significado, la doceira de Caçareilhos que alhá staba to ls anhos biu l sou campo acupado por ua rulote que bendie farturas i pipocas. Seinhas de ls tempos, cousas naturales.

Ora, passa que ne ls redadeiros, bamos a dezir, 10 anhos, alguns de ls curas que stubírun na paróquia de San Pedro – i yá fúrun uns cinco ó seis – dou-le la zízara de bedar las porciçones de l Ancontro i de la Çpedida, por bias de dezir que ye ua cousa sien santido fazer porciçones cun eimaiges eiguales, inda porriba a ancuntrá-se, que Nuossa Senhora nun se debe azinolhar, que aqueilhas porciçones son ua boubada i que nó i nó.

Delantre de argumientos tan “mociços”, i para nun salir de l campo lexical de la religion, solo apetece dezir: ai lhoubado seia Dius, haba santa pacéncia para l que un ten que oubir!

An buona berdade, estes argumientos ousados para bedar las porciçones son, lhougo a la cabeça, ua oufénsia para ls miles de pessonas – i de curas! – que fazírun las porciçones por essa bida atrás; apuis, deixa amplache l çprézio que sínten pulas crenças i pula Fé de l pobo i, por fin, bamos a ber: an San Pedro si somos pouco studados i guiamos-mos por cousas simples i singelas, mas star a la spera de l seclo XXI para que beníssen antendidos de fuora a amostrá-mos que las eimaiges de la porciçon reperséntan la mesma Santa… solo apetece respunder: a sério?! Nunca habiemos arreparado!

Se más nun houbisse, ls argumientos esses sbarrúlhan-se eilhes solos quando bemos que alguns de ls curas que pássan por San Pedro cuntínan a fazer las prociçones cumo siempre se fazírun i outros nó, cousa que nun bate citre. I por falar an nun bater citre: sien salir de l cunceilho i se procurar nun oufende, na Senhora de l Naso, que eimaiges ban dambas a dues na porciçon sien que a naide le pareça mal?! Bá, bamos a tener juízo i a fazer las cousas cun tento: pal anho que ben, la Senhora de l Picon queda arrecolhida ne l altar Deilha, que haber dues eimaiges de Nuossa Senhora na mesma porciçon ye ua oufénsia a Dius i arreda ls fieles de l’Eigreija. Isto, claro, a menos que haba mandamientos çfrentes cunsante la smola de cad’un ó stéiamos sujeitos als “houmores” i a las zízaras de l pastor que guia l ganado.

Ye más: cumo tal, un cachico más loinge, nas porciçones de la Semana Santa an Salamanca, un de ls puntos altos ye la porciçon adonde s’ancóntran las eimaiges de Nuossa Senhora de las Angústias cun Nuossa Senhora de la Spránça, nua simbologie – simbologie! – stroudinária i guapíssema: l Delor que ancontra la Sprança, todo simbolizado na figura de la Birge Marie.

L que berdadeiramiente mos fai spece an argumientos tan rastreiros ye l’ancapacidade que parécen traduzir para antender que un ritual ye sempre ua repersentaçon simbólica – simbólica! – atualizada cun ua anterpretaçon que l splique. Mesmo que nun l anténdamos na sue totalidade – ó mos pareça un çparate que nun fai santido - nun tenemos l dreito de l demudar al son de ls nuossos apetites i de las nuossas birras. Isso ye l que qualquiera Taliban tenerie proua de fazer! Que l mesmo home mos diga para quemer l Cuorpo de Cristo i buer l Sou Sangre i lhougo a seguir mos diga que nun podemos fazer ua porciçon cun dues eimaiges de Nuossa Senhora, que isso nun fai santido, i muito menos fazé-Las ancuntrar que ye ua “ampossebelidade”, isso ye de… bradar als Cielos. Cumo tal, assi de repente, que melhor sítio para mos ancuntrarmos cun nós mesmos que l Santuário más guapo de l mundo – La Senhora de l Resairo.

Para acabar: manhana ó passado, l cura de San Pedro lhaba las manos de l serbiço que fizo (i tenerá que las lhimpar a la parede) i scapa-se para outra tierra qualquiera, a pregar(la) a outra fraguesie; i nós quedamos acá, mansos i buonos, mais "catequizados", mas sien fiesta de la Senhora de l Resairo.

Assi i todo, nun se trata eiqui de star acontra ls curas ó acontra l’Eigreija ó la Religion, muito pul cuntrairo. Todo mundo que bibe an San Pedro - todo mundo! – ye çclaradamiente Católico, Apostólico, Romano. Todo mundo, l que talbeç faga de nós un caso cada beç más ralo ne l çtrito de Bergáncia. Ye Católicos que queremos cuntinar a ser. Na nuossa singeleza, cumo mos ansinórun ls nuossos maiores, culas nuossas birtudes poucas i muitos pecados. Deixai-mos morrer de “muorte morrida”, que bien bóndan to las malinas que padecemos; nun mos mátades la nuossas crenças i la nuossa Fé de “muorte matada”, anté mesmo porque, inda que súframos a bermos-mos apagar als poucos, “l’outanázia” que mos stan a fazer, isso ye cousa bien pouco Católica.

Que Nuossa Senhora de l Resairo mos puoda perdonar a todos.