Stou a lhebar bien a sério bender l altemoble que yá nun ye nuobo, só para berdes cumo las cousas son, l persidente de l’outarquie de Lisboa yá l proibiu de descer pulas rues para alhá de l Marques de Pombal, i mercar un burrico, cumo nun me dében dar grande cousa por este munton de lhatas, spero bien que inda deia para un an segunda mano, nun percisa de ser mui buono, talbeç de meia eidade, meiarruçado.
Puodo meter ua manjadoura na garaige, puis queda sien nada, fazer por ua ferranha, apanhar uns fenascos, de beç an quando prende-lo nas traseiras de casa que ls mius bezinos son buona giente, l mais deilhes tóman cunta de ls garoticos, ls nietos porque ls filhos nun aguentórun l touron de la crise i yá ls çpejórun a tiempo anteiro, cumo nacírun eiqui, son ninos filhos de fidalgos até l’ancuntran gráçia i ambáian-los cuntando-les malbadezas i façanhas destas criaturas bondosas i pachorrentas. Cúntan-le mintiras, porque estes cuitados son seres que nun ténen maldade, a las bezes até dá duolo, son tan buonos que nien xútan las moscas cun miedo d’abanar l rabo.
L altemoblico cuitado yá passou las áfricas, mas ten-se aguentado que nien zampeiras atrás de las cabras nas arribas, neste bai i torna a la capital, poucas fúrun las bezes que m’oubrigou a salir cul garrafon de plástico a las bombas de gasolina, uma ou outra si tubo que ir a la quarta dun reboque até la puorta, mas caramba ua bida ten altos i baixo i nien siempre l dunho (you) le dou ls cuidados que mercie, i inda hai que meter ne l sou belhete las bezes que chubiu l Maron, porque la IP5 i IP23 inda nun staba ende na mamada, agora ten que ír-se a l’anspeçon anual alhá pa l fin de l anho, l anspetor de la radeira beç mirou-lo de sgueilha, até las gorjas se m’antrasgórun, desta beç ye que nun passa mesmo, nun sei se ye funcionáiro público, mas peçque bai a ser l carrico que las bai a pagar porque anraibado el si andaba.
Al menos se tubir suorte na troca, berdir l altemoble por uns cientos d’ouros, tamien nun sei para quanto bai hoije un jumentico qu’inda ande, mas dessa oubrigaçon quedo lhibre, que you saba ls burros inda nun ban a l’anspeçon i nunca mais bou a tener problemas an quedar stacionado, ua bestia cabe adonde habir un poste de lhuç nien culs lhafraus da la EMEL, nestes nun bótan las trancas nien las fitas amarielhas, porque stou a pensar ansinar-lo a dar uas patadas i uns pinotes a quien s’arrimar cun mala fé, i talbeç esso deia jeito para algun que s’antolhe a fazer l burro-jacking.
Ye de lhebar bien a sério, a quando stá hoije la gasolina, ls trasportes públicos, l stacionamiento nun parque, la stampa que se paga a las finanças, l seguro, la manutençon? Caramba you nun tengo un carro, you tengo un mamon, i andar ye l andas, ye parado i arranca, que bien bagar tenes, i inda me dízen que bota muito gaç pa l aire!
L burrico talbeç nun ande tan debrebe cumo l altemoble, porque nun ye a cabalhos, mas tamien que adelantra na IC19 (Sintra), na lhinha de Cascais ou na Puonte 25 d’abril tener un cuntador que bai de 0 até 380, se naide mete mecha.
I que naide me benga a dezir que l burrico bota pul rabo stierco poluidor, nó, essa buosta nun ye i siempre fui eicológico, poluiçon ye todo l que ls mandones i ls arrebanhones stan a fazer a las mies algibeiras.
Sem comentários:
Enviar um comentário