(Caricatura de Henrique Monteiro)
Se un francés ou
alguien de lhéngua francófona procurar dados subre essa tal apersentadora pertuesa
chamada Catarina Furtado, rapidamente se dará de cuonta que na Wikipédia an
francés nada aparece cumo an muitos outros eidiomas de l mundo. Proba que essa
pessona nun ye afinal assi tan cunhecida nien talbeç antresse muito quien nun
saba tamien falar pertués, anglés, spanhol ou até alman...
Puis a mi, anque more
nun país cumo la França, chamórum-me bastante l’atençon alguas linhas screbidas
acerca dessa tie na página 20 dun de ls últimos númaros de la rebista Visão que
merquei hai uns dies an Sendin.
Mesmo na punta de
riba de la página mas nua squina assi i todo, alhá stá l retrato dua tie inda bastante
jobe (ne ls sous 40 anhos mais ou menos), cun un bestido quelor de rosa, un
rosa quaije burmeilho, mini-saia, çapatos altos i mui brilhantes, unhas i
beiços pintados... Nun tubisse l pelo castanho cumo l ténen la maiorie de las
Pertuesas mas si lhouro até nun poder mais al punto até de parecer quaije
arteficial, até diriemos que bien se poderie aparecer, essa apersentadora de la
telbison pertuesa, a qualquiera ua dessas bonecas barbies que a partir de ls
anhos sessenta ampeçórun a serbir de modelo (anfeliçmente único i mui lhemitado)
para bárias giraçones de mocicas (i mocicos) an muitos países de l mundo i nó apenas ne ls
Stados Ounidos adonde essa marca, se nun m'anganho, ampeçou purmeiro a eisistir.
Mas fui l
comentairo que acumpanha l retrato dessa tie puls bistos anton mui afamada an Pertual
que me fizo reagir inda mais:
“ Sou disciplinada
nas compras ” citaba la mesma rebista nessa mesma página retomando ua frase
dezida por essa mesma apersentadora, a perpósito, cumpletaba tamien Visão, “ de
la sue reduçon de ourdenado na RTP para 24 mil euros por mês ”
I mais nada. Só
que quando cheguei al fin de l comentairo, preguntei a mi própria se inda sabie
ler ou se por acaso habie de repente, cumo nun filme de ciéncia ficçon, mudado
de era i stubíssemos nun mundo an que cada qual poderie cumo se fusse un
milagre...
ganhar nada mais
nada menos que 24 mil euros por mês !!
Ou anton... que
burra sou you (i bós tamien leitor(a) ?) !!
Anda! Pon-te
lista! Que falta de anteligéncia quaije nunca pintares las unhas i usares
quaije siempre çapatos sien salto... Anton nun bés ?!
Mas por mais sfuorços
que faga para antender este mundo ne l qual bibimos, todo me lhieba a pensar
tamien nua cousa...
Furtado: particípio passado (neste caso tamien cun
balor de adjetibo) de l berbo FURTAR que an pertués quier dezir:
- apoderar-se de coisa
alheia; substrair fraudulosamente; roubar
- falsificar,
contrafazer
- desviar, ser
ladrão...
Quien ye burro(a)
afinal ?
Talbeç solo aqueilhes
i aqueilhas que se deixan facelmente eiludir i nun quieren afinal ber l
eissencial i l mais amportante (l mais scandaloso i rebuoltante tamien) mas ounicamente l que ye arteficial, eilusório i
finalmente sien antresse !
6 comentários:
Buonas nuites Ana Marie,
Ye scandaloso haber este tipo d'ourdenados nun paíç cumo l nuosso Pertual an que la crise eiquenómica i ls sacrifícios ampuostos para afronta-la stan a fazer un rosairo de bítimas.
Nun podemos quedar andiferentes a estas scandalosas zeigualdades salariales que stan a poner an causa la própia subrebibéncia de l nuosso paíç.
Cun lhágrimas ne ls uolhos, a las bezes anterrogo-me:
Que feturo hai rialmente para Pertual, pa l'amor pátrio, pa la nuossa giente, para ua eiquenomie que sustente l nuosso paíç i garanta un nible cultural ouropeu?
Parabienes por este testo que demostra que nun quedais andiferentes al que se stá a passar ne l nuosso stimado Pertual.
Un abraço de l tamanho de l mundo,
Leonardo
Buonas nuites, Leonardo,
Tenemos que ser muitos a dezir las mesmas palabras que estas buossas que gostei de ler.
Hai por acaso esse salário que ye scandaloso mas muitos outros anfeliçmente puls bistos, uns inda mais eilebados até! Até parece mintira !
I para quei ?
Para que esses quantos prebilegiados i muitas bezes tamien apadrinados arrecáden l que les oufrece l Paíç cun tanta generosidade (mas angenuidade tamien!) subretodo ne ls tiempos de hoije, talbeç nien sequiera ne ls bancos pertueses mas si an todos esses paraísos fiscales que hai por esse mundo fuora para nun pagar ampostos ou anton l mínimo possible...
Qual la soluçon que l Paíç deberie anton tomar senó acabar ourgentemente cun todos esses abusos i prebilégios de outros tiempos que lhieban l Paíç pura i simpresmente a la bancarrota ?!
Ye todo esto que ls Pertueses ténen que ber cun la maior atençon i ourgéncia possible para poder agir antes que seia tarde.
Un abraço tamien, talbeç anton de l tamanho de l mundo
Ana Maria
Buonas nuites Ana Marie,
Buono serie sermos muitos a tener la coraige de denunciar estes salairos scandalosos i “antolerables remuneraçones”, cumo dixe hoije l Porsor Marcelo Rebelo de Sousa na TVi quando l preguntórun se cuncordaba cula remuneraçon mensal melionária de 982.300,00€ a la Drª Conceição Leal, gestora de l Banco BANIF,que stá anterbencionado pul Stado pertués i aguarda restruturaçon para tapar ls 69.000.000,00€ de prejuízos ne l purmeiro trimestre deste anho.
Estes prejuízos i estas i outras remuneraçones scandalosas de banqueiros pertueses i outros “prebilegiados i muitas bezes tamien apadrinhados” son ua forma andireta d'houmilhaçon de l pobo pertués que a muito custo subrebibe zmagado por muitos ampuostos i taxas.
Gustei muito desta buossa anterrogaçon/sclamaçon “Qual la soluçon que l Paíç deberie anton tomar senó acabar ourgentemente cun todos esses abusos i prebilégios d'outros tiempos que lhieban l Paíç pura i simpresmente la la bancarrota ?!”
Gustei tamien muito de la repuosta que destes a seguir “Ye to esto que ls Pertueses ténen que ber cun la maior atençon i ourgéncia possible para poder agir antes que seia tarde.”
Si percisamos de denunciar las anjustiças i d'agir para çcubrirmos nuobos métodos d'acabar cun estes “saqueadores” de l rendimiento nacional.
Muito oubrigado por este buosso antressante comentairo, que que demostra, mais ua beç, que nun quedais andiferentes a las anjustiças que se stan a passar ne l nuosso stimado Pertual.
Un abraço de l tamanho de l mundo,
Leonardo
Buonas nuites, Ana.
Parabienes pul baliente testo!
Sabeis q'essa repioqueira yá me proibiu de quementar na sue páigina de l Facebook por le dezir essas berdades todas i outras? Ye apersentadora, mas yá muito tiempo que naide la bei a apersentar nada, a nun ser l sou luxo. I apuis inda anda a fazer l papel de bundosa cun las criancicas. L q'eilha "furta" daba para le matar la fome a muitas...
Abraço!
Enviar um comentário