Botei me al termo

Até peçque las frolicas de ls lhameiros, bordas de ls caminos i adiles querien cumpensar cula sue guapeç la delor que m’íba n’alma.

Zde largos anhos que por este tiempo me boto a caminho de Zenízio (bibo an Lisboua l anho todo) porque la bida ye assi, fago-lo solico, la tie que m’atura solo l puode fazer nas bacances de berano, nun bai. Tamien bos digo que solo ando por alhá un par de dies, nun ye que nun gustasse quedar mais tiempo, mas ye ua queston de fé, chego i yá stou a pensar ne l die que me scapo.

Gusto desses dies, abro la puorta i las jinelas de la bielha casa (casa bielha) ancerradas todo l tiempo, dou uas bardeiradas ne l chano, i sego cula gadanha las yerbeiras que médran a la puorta i al redror, todo cousas que gusto de fazer. Anton apuis si boto-me al termo i ye eiqui que la cousa duol, cumo se fusse ua ferida que inda bota broça, porque l’aldé tener pouca giente inda ende stan, beio-los, mas l termo stá zerto. I ye ne l termo que las alhembráncias reçúman mais.  Aquel termo abandonado, un stende l oulhar até l anfenito de l praino, i nun bei biba alma, ye dun muorrir-se. Si porque bénen al de riba toda ua semba d’eimoçones, alhembráncias doutros tiempos que demórun a abaixar-se i atéiman an fazer dun gato çapato. Aquel termo a ser paçido por buiadas i ganados, de lhameiros cun baranhos de feno, trigales a ondiar i paixaricos a chilrar, pessonas cun quien se puode falar yá nun hai. Mas duol, i mesmo que eiqui ou eili inda se béian alguns paixaricos, seres bibos, até mesmo esses yá son mui poucos, tamien eilhes yá se fúrun, i para siempre.

Puode dezir-se que todo este assossego fai bien a l’alma i al sprito, que sirbe para aclarear las eideias i arrumar la cabeça, que l siléncio a que somos botados nestas caminadas ye ua bençon de Dius, mas todos nós percisamos de mais, se assi fusse l miu ouniberso staba baziu.

Todos nós oubimos dezir i noticiar que alhá bien loinge, ne l termo de l Stado Brasileiro, hai pessonas que lhúitan por spácio, porque percísan de la tierra, cháman le l Mobimiento Sien Tierra. 

Por eiqui quier me parcer que ye la tierra que reinbindica giente, ye la tierra que percisa de pessonas, porque ende stan ls caminos cumo benas sien la sangre, ls rigueiros cun auga que sobra, las ancruzilhadas i cruzes a apuntar sentidos que naide bai, las paredes, fincones i marcos a marcar cousa nanhua. 

Sobrou me l oulor fresco de la berdura, l doce de las froles.