You, nuite de temporales

Sentada nua squina de l tiempo, sou tarde de temporal.
Ne l rugaço pongo las manos fries cumo que a spera que la chúbia se baia, l aire deixe de fungar, las óndias gigantes déixen de m´atrementar. Pongo las manos ne l rugaço, perdidas, cansadas, sien bida, a spera neste cais que se scacha, nua spera einútel, adonde ningun barco arrima, farol que nun dá seinhas.
De repente l lhuçfuçque ben, la nuite frie se striba, la nuite de ls noufrájos, la mie nuite. Sento-me ne ls çtroços, las óndias arrebéntan als mius pies, fuortes, gigantes i, la mie alma chora al modo de la rebentaçon.
 Sinto-me perdida, sien pontos cardinales, sien bússela, tentiando achar las caleijas de la madrugada que fuortemente deseio, la madrugada que tenga la frescura de la hourtelana, l cheiro de la madressilba, l gusto de la mora, la brancura i la dondieç de l lhino gasto.
La nuite tapou las frinchas a la madrugada, i, atafanhada pula ampoténcia de nacer, arreculhiu-se atrás de las anubradas cerradas cumo castielhos de fumo.
Alhá loinge un farol a amostrá-me outro rumo, un barco que se bolca, l miu rugaço que se alhaga, las mies manos que s´afógan, l miu peito que dá las últimas, l cais a derramá-se, i, you, nuite de temporales,… na squina de l tiempo adonde me sento…