L tou grito

Nien un trinado d'abe a cruzar l cielo me derreterie assi: aquel grito era tou. Tan bibo cumo la frecha de lhuç que se sgueirou pula casa quando abri la puorta de l lhado naciente.

Era la surpresa de la fiesta, l'einocéncia dua ourora pura - la gana de bibir.

Soubo a calor de fogueira an nuite gilada. Tubo l poder debino de remoçar i fazer bibrar las cuordas dua abó cun sede de cantigas: esta fui dua ternura de arrepelar – l tou grito.

Griteste para te scunderes - cumo quien ten priessa de ser ancuntrada. Bolei na tua alegrie cumo se (presa naquel abraço) tubisse ancuntrado la rialidade de l paraíso.

Las tues palabras çpuntában bibrantes - an cachoneira biba, cun  ganas de me sentires adentro de l tou ouniberso.

Stralhórun foguetes de lhágrimas a rumpéren la suidade.