[Eiqui deixo l testo que le ambiei a la Senhora Menistra de la Justícia, por antermeio de l Delgado de la Orde de ls Abogados an Miranda, dr. António Neto, an júnio atrasado. Cun esta seguiu tamien ua bersion an pertués.]
NUN HAI REZONES PARA CERRAR L TRIBUNAL DE MIRANDA DE L DOURO I OUTROS, TAL CUMO FUI ANUNCIADO.
ESSA MEDIDA YE ANJUSTA I PELIGROSA. NUN PUODE, POR ESSO, SER TOMADA
Fui cun spanto que bi anunciado que iba a ser cerrado l tribunal de Miranda de l Douro i, cun el, bárias dezenas de outos. Anque yá se houbira amentado de l assunto hai uns anhos, nunca acreditei que la medida fura palantre, tan grabes son las sues cunsequenças. Para alhá de star ounido a l’andinaçon de ls mirandeses, deixo eiqui trés notas al cuidado de la Senhora Menistra de la Justícia, i de quien de dreito.
CERRAR TRIBUNALES YE DAR UN PASSO NE L SENTIDO DE QUANDO ÉRAMOS BÁRBELOS
Muito se ten falado de que la justícia ye un problema de Pertual i de ls pertueses: ls processos nun ándan i acában por prescrebir; diç se que hai ua justícia pa ls ricos i outra pa ls probes, puis quien nun ten denheiro deficelmente tenerá justícia; las pessonas son mais debrebe cundanadas ne ls jornales do que ne ls tribunales; ls tribunales stan atupidos cun caramelos de processos que melhor poderien ser resolbidos cun outros meios mais delgeiros i menos caros…. i la lista de problemas poderie cuntinar.
Para esses problemas de la justícia yá se anda a saber de seluçones hai muito tiempo, mas todo bai quedando na mesma i, al modo que l tiempo passa, bai de mal a pior. Uns quejírun tratar todo cumo un problema de férias, i fui l que se biu; agora hai outros que quieren resolber las cousas ancerrando uns 47 tribunales, i tamien nada bai a demudar quanto als problemas de fondo de la justícia. Ou melhor, algo demudará, mas hai que tener bien cuncéncia dessas mudanças: pessonas que ban a quedar cun menos justícia, cun ua justícia inda mais cara i bista mais al loinje, i essa ye ua giente houmilde, que muito trabalhou por este paíç, sendo esta mais ua paga a que ls governantes yá mos afazírun i a toda la giente de l anterior de l paiç.
Quieren medir la justícia an númaro de processos, an zlocaçones de tantos i tantos quilontros, todo aperpuosto por quien nunca quijo saber de la giente que mora nesses sítios i talbeç nien seia capaç de ls apuntar ne l mapa. Esso nun le amporta, hai que aperponer algo cun l argumiento de que se bai a poupar, mas nun son capazes (nun quieren, sien que s’antenda porquei!) de antender que todo bai a quedar mais caro. I bai a quedar mais caro, porque la degradaçon de la democracie nun ten précio i bai se a medir an abstençones, an zantresse, an refuorço de l cumplexo rial de abandono que dura hai cientos de anhos. Esse précio ye tan alto que puode poner an peligro la democracie. Cerrar tribunales ye dar tiros ne ls pies de la democracie, puis ls tribunales son un uorgano eissencial de la soberanie democrática.
A las bezes, hai pessonas que, quando quédan anrabiadas ou zourientadas, se bótan als cuntapies a todo l que ténen delantre, nien que seia ua piedra de la rue, ou anton çcarrégan ne ls mais fracos que eilhes i que le stéian a la mano. Ye esso que la Senhora Menistra de la Justícia stá a fazer al cerrar ls tribunales i, mais cedo ou mais tarde, l pie bai le a doler a sério, Dius querga que nun l cobre. Talbeç eilha cuide que stá a resolver algun problema, mas, se parar un sfergante para pensar, berá que ye un erro mais grande que Pertual.
Cunsagra la Custituiçon de la República Pertuesa que ls cidadanos son armanos delantre la lei [art. 13.º], mas cun todo esto nun se cunsigue ber adonde stá essa eigualdade fuora de la letra de la própria Custituiçon. Ye essa mesma lei fundamental que diç que «a todos le ye assegurado l acesso al dreito i als tribunales para defénsia de ls sous dreitos i antresses protegidos por lei…» [art. 20.º/1], mas l que an muitos destes causos se stá a passar ye ua berdadeira negaçon de l acesso a la justícia an cundiçones de denidade i de eigualdade cun ls outros cidadanos.
Todo esto quier dezir que l mundo nun puode demudar, que todo há de quedar sempre na mesma? Nada desso, mas la mudança ten de ser bista nó cumo ua stinçon de serbícios públicos i ua negaçon de l acesso de ls cidadanos a esses serbícios, mas cumo un modo de reforma de l Stado, que premita melhor prestar esses serbícios i nó rezones solo eiquenomicistas, inda porriba falsas cumo ye l causo.
UA POLÍTICA PA L ANTERIOR DE PAÍÇ
L percipal argumento apersentado para acabar cun l mais de ls tribunales ten a ber cun l pequeinho númaro de processos, l que quier dezir que eiqui nun se bei l problema de processos a mais que eisíste nas cidades cun mais populaçon.
Hai poucos processos por dues rezones percipales: a la ua, porque hai menos giente, por bias de las zerteficaçon destas regiones de l paiç; mas ua segunda rezon, nun menos amportante, ye que nestes sítios la bida social i eiquenómica ye menos cumplexa i portanto nun ye ua naciente tan grande de porblemas que téngan de chegar als tribunales.
Ora, l que tenemos bisto ye ua política que an beç de cuntreriar la zerteficaçon la ten benido a acelarar pula salida de serbícios públicos eissenciales pa la bida de las pessonas, séian serbícios de quemunicaçon, an special l camboio, ls serbícios de eiducaçon, de salude, de correios i por ende afuora, nua sangrie sien fin, quier dezir até al zerto cumpleto. Agora ye la justícia, i qualquiera die seran outros serbícios, até que mais die menos die se decrete la proibiçon de morar nessas zonas, streformadas an eimensos parques naturales, ampróprios para pessonas bibíren, i adonde, quando muito, poderan eisistir algues barraiges de que ls moradores que cun eilhas súfren naba sácan an benefício. Ye un febre que cun todo quier acabar, an beç de reformar i de adequar a la situacion eisistente.
L argumento ye sempre l mesmo: nun hai dinheiro para mantener esses serbícios, que quedan mui caros. Ora, este argumento, l mais de las bezes, ye ua mintira pegada i amentar nel ye muita beç un ansulto a l’anteligença de las pessonas. La berdade ye que ls bários governos ténen deixado que se multeplíquen pequeinhas Lisbouas an cada sede de cunceilho, cun la criaçon de infrastruturas que nun sírben las pessonas i quédan a las moscas, solo para sastifazer la baidade de alguns, mas nó para serbir las pessoas.
Esta perpuosta yá ben de loinje i nun stá solo lhigada a este goberno, mas tamien al que bieno antes del, l que bate cierto cul modo cumo ls partidos de governo sempre ténen ancarado estas questiones: ne l eissencial stan de acordo, nó de modo abierto, contra l anterior de l paiç, mas de acordo para lo eignorar, para nun querer saber del, de acordo para subre el fazer abaixar un silenço sepulcral.
Antoce, l que hai que dezir ye mui simples: defina se ua política pa l anterior de l paiç i, a la par i de acordo cun eilha, ua política de reforma de l Stado, ende ancluídas las outarquies, que seia para serbir l pobo i nó las clientelas políticas de ls bários sítios. Ende poderá fazer sentido pensar tamien na question de ls tribunales. Baia por este caminho, Senhora Menistra, i nó por caminos sien sentido que inda porriba fúrun outros a ampeçar i a aperponer. Nun querga quedar cun esta mancha ne l sou currículo.
MIRANDA DE L DOURO, UA TIERRA QUE APLEDIA POR JUSTÍCIA
Miranda de l Douro ye la cidade mais a Nordeste de l paíç. Talbeç la que mais loinje queda de la capital, un de ls símbolos de l abandono de l anterior por parte de ls poderes públicos centrales zde hai seclos, mas tamien símbolo de la gana de ser pertués contra todo i contra todos.
Miranda de l Douro cunserba, inda hoije, la única lhéngua defrente de l pertués que se fala na Pertual, retombo de la formaçon de la nuossa nacionalidade i de la paisaije lhenguísta an que naciu Pertual i ls sous purmeiros reis. Esta ye ua matriç cultural que ten sido çpreziada por poderes públicos ciegos, que lhóuban Ls Lusíadas an palabras, mas çprézian l que eilhes cántan.
Mas, por bias de la lhéngua que fala, Miranda de l Douro ye tamien un de ls símbolos mais grandes de la modernidade de Pertual, puis ancarna la diversidade contra l monolitismo, la cumbibença pacífica antre lhénguas i culturas contra la tiranie de ls poderes culturales, solo apostados na ganáncia i ls sous cultíssemos arautos a arrotar neocolonislismo por todos ls poros. L tiempo s’ancarregará de los chamar a la rezon, speremos que nessa altura yá nun seia tarde de mais.
Miranda de l Douro nun ye mais que las outras tierras, mas ls ataques que contra eilha son feitos al sacar dalhá l tribunal, son la spresson máxima de l abandono de anterior i la afirmaçon dua cultura que çprézia l que de mais balioso tenemos, dando eisemplo al paíç i al mundo dua mentalidade i dua política que çprézia l que de mais balioso produziu l género houmano, la sue cultura, las sues lhénguas, la lhuita stórica para que Pertual se tenga mantubido cumo naçon por seclos i seclos cun muito sangre de ls pobos de frunteira.
Por mi, cumo cidadano, spero que la rezon benga arriba cumo l azeite i que todas essas medidas que se eirien a tomar nun pássen dun suonho malo, i que la justícia cuntine a ser feita por tribunales acerca las populaçones, cun respeito pula eigualdade de ls cidadanos delantre la lei i cun assento nua política que tome l anterior de l paiç cumo ua parte de Pertual, cun respeito pula nuossa stória i pulas sues gientes.
Júnio de 2012
Amadeu Ferreira
Sem comentários:
Enviar um comentário