Stá tan guapo l Praino!

Cerrei ls uolhos, resfolguei fondo, tan fondo cumo se fusse la redadeira golfiada d´aire fresco a antrar-me, cumo que a lhebar esse aire comigo para resfolgar l resto de ls mius dies. Ye siempre assi quando me bou. Ye siempre assi quando l pie carrega ne l acelarador de l carro para chubir l Naso arriba, nun adius cun la bide a sticar, nun parto tirado a fierros, nino que nun quier salir de la barriga de sue mai.

Staba tan guapo l Praino!!!

Deixeste l pelo branco, dezien-me quando me bien. Si, hoije chegou-bos mais ua cereijeira a la Speciosa, respundie-l you, cun ua proua tamanha, por ser mais ua cereijeira cargada de branco. Ye nesses sfregantes que nada me duol l cinza de l miu pelo. Nien sei se algua beç me doliu çque se me acabou la tinta pa l cubrir de quelores, nun sei se la tinta, se la pacéncia… Si, que tamien para isso hai que haber pacéncia i hai eidades an que la pacéncia yá nun ten pacéncia para que se cunsuma cun cousa pouca. Dolie-me anquanto era raiç branca ambaixo de l burmeilho, a bé-se medrar an cada die, nun pelo que medra que nien roseira na Primabera. Que proua ser mais ua cereijeira cargada de flores!

Stá tan quelorido l Praino que truixe guardado ne l miu peito!...

L amarielho de las nabiças que scapórun a l arroç para acumpanhar tabafeias ó a la boca de las bacas, fázen agora la cuntinéncia a quien passa, chenas de bitória por haber bencido la deilhas. Las maçaneiras cun pelindrengos de branco i quelor de rosa, las cereijeiras cargadas de ramalhetes, ls patalhobos ne l meio de las touças a spreitar las racicas dun sol que bieno dapeto, caliente, para que floríssen na Páscoa tardiega. Cortei-le la lheinha i pistanhórun por habéren recebido l pormeiro sol çcubierto, sien que l dira tiempo a se afazéren a la lhuç fuorte. Hei-de ir a bé-los abiertos, a relhuzir cumo seda, hei-de ir, assi la bida me deixe. Ls goibos,… son lindos ls goibos altibos, quando piçcan l uolho a las bioletas ambergonhadas na borda de ls caminos.

Cerrei ls uolhos i parei para scuitar ls anxames de abeilhas anriba de cada árbole, sien cortiços adonde drúman, sien fabos adonde póngan sous puolos, porque cormenas nun beio, mas sien paraige ls zunzuns a parecéren ls zunzuns de carros nua abenida de Lisboua na hora de ancerrar ls sotos.

Cerrei ls uolhos i scuitei outros bolares, la chínchara cun sou cantar i l cuco a querer que las merujas flúren. Yá nun ténen riata palas merujas, ls cucos. Cántan, cántan i las merujas cuntinan a medrar nas augueiras, para manjares de quien de fuora benga na Páscoa. Cun la gana que le ten siempre quien porende afuora anda, come-las cantadas pul cuco, anfeitadas cun sues floricas brancas! Abelhones, uns negros, outros azulados, grandes cumo me parece que nunca habie bido, anriba de la glicínia roixa cargadica de ubas de flores a fazéren selombra a la baranda.

Música, mais música sien anstrumentos. Quedo a pensar porque nun haberá abelhones eiqui na mie glicínia, florida antes de me ir parriba. Secálha nun regísten al yerbicida que ls carros pónen ne l alcatron i ne l aire. L carro a fungar la strada de l Naso arriba… Nun puodo mirar para trás senó sbarro-me, nun puodo deixar de le cargar ne l acelarador porque senó perde l'andadura i apuis gasta mais gasólio ó torna para casa d´arreculas que tamien eiqui l carro resfuolga melhor.

Mal cheguei arriba i birei caras a Malhadas, mirei-te nial, cumo se fusses un persépio anfeitado cun ferranha i yerba an beç de mofo, resfolguei fondo cumo se quejisse lhebar l aire anté que buolba, drobei-te bien drobada para te lhebar no miu carro pequerrico, para ir porende amostrando al mundo las glicínias cun abelhones, las cereijeiras cun ramos de noiba, la tierra remexida puls tratores adonde you faga mie huorta cun freijoneiros de rodriga, alface repolhuda, tomatos nalgudos i cebolhas grandes i tienras.

Stá tan guapo l Praino, i, truixe-lo comigo!...